Maktablarda o'qituvchilarga dars soatlarini taqsimlash tartibi o'zgardi

Maktabgacha va maktab ta'limi vazirligi ijtimoiy tarmoqlarda o'qituvchilar o'rtasida dars soatlarini taqsimlash tartibi o'zgargani haqida tarqalgan xabarlarga rasmiy munosabat bildirdi.

Yangi tartib va uning mazmuni

Ma'lum qilinishicha, 2025 yil 28 oktyabrda Maktabgacha va maktab ta'limi vazirligi, Iqtisodiyot va moliya vazirligi hamda Sog'liqni saqlash vazirligining qo'shma qarori bilan «Umumta'lim muassasalarida sinflarni komplektlash hamda tarifikatsiya ro'yxatlarini shakllantirish tartibi to'g'risida»gi nizomga o'zgartirish va qo'shimchalar kiritilgan. Mazkur hujjat Adliya vazirligida 3271-1 raqami bilan davlat ro'yxatidan o'tkazilgan. Yangi tizim 2026–2027 o'quv yilidan amaliyotga joriy etiladi.

Vazirlik ma'lumotiga ko'ra, mazkur o'zgarishlardan asosiy maqsad o'qituvchilarning ish yuklamasini kamaytirish, dars soatlarini taqsimlash talablarini soddalashtirish hamda jarayonni yanada shaffof va adolatli tashkil etishdan iborat. Yangi tartib ko'plab pedagoglarning takliflari asosida ishlab chiqilgan bo'lib, dars yuklamasini taqsimlashda qo'llanilgan ustuvorlik mezonlari 19 tadan 10 taga qisqartirilgan.

Mezonlardagi o'zgarishlar

Xususan, barcha o'qituvchilar uchun teng imkoniyat yaratish maqsadida quyidagi mezonlar bekor qilingan:

• dunyoning top-1000 universitetlarini tamomlaganlik;
• xalqaro va asosiy fan olimpiadalarida o'quvchilari g'olib bo'lgan o'qituvchilarga ustuvorlik beruvchi mezonlar.

Endi dars soatlarini taqsimlashda pedagogning kasbiy mahorati, milliy yoki xalqaro sertifikatlarga egaligi, zamonaviy kompetensiyalari va ta'limda erishgan natijalari asosiy mezon sifatida inobatga olinadi. Vazirlikning ta'kidlashicha, mazkur tartib o'z ustida muntazam ishlaydigan, yuqori kasbiy salohiyatga ega va sifatli ta'lim beradigan o'qituvchilarni rag'batlantirish, ta'lim sifati hamda o'quvchilarning bilim darajasini yanada oshirishga xizmat qiladi.