Maktablardagi intizom muammosi va o'qituvchilar duch kelayotgan tizimli qiyinchiliklar

O'quv yili yakunida Toshkentdagi maktablardan birida intizomsiz o'quvchini kaltaklagan o'qituvchiga jinoiy ish ochildi, lekin yakunda u aybsiz deb topildi. Tarmoqlarda kimdir o'qituvchini qoraladi, kimdir esa o'quvchi va uning ota-onasini. Kun.uz shu maktab direktori va jamoatchilik faollari ishtirokida bu kabi holatlarga olib kelayotgan sabablarni muhokama qildi.

Suhbatda Mirzo Ulug'bek tumanidagi 275-maktab direktori Mavluda Nasriddinova, pedagoglar Shokir Tursun va Hamid Sodiq hamda huquqshunos Abdurahmon Tashanov ishtirok etishdi.

O'qituvchining qo'lida richag yo'q

Shokir Tursun pedagogik nuqtayi nazardan o'qituvchining harakatini oqlab bo'lmasligini, lekin ro'y bergan holat tizimli muammoning oqibati ekanini ta'kidladi. Uning so'zlariga ko'ra, hozirgi kunda o'qituvchining qo'lida ta'sir o'tkazish uchun deyarli imkoniyat qolmagan. Ichki ishlar xodimini chaqirish yoki yomon baho qo'yish kabi choralarning ham o'ziga yarasha to'siqlari bor.

Agar o'qituvchi prinsipda turib ish boshlasa, tuman xalq ta'limi bo'limi va maktab obro'si uchun unga bosim boshlanadi. Hozirgi amaldagi yangi baholash tizimi bo'yicha qo'yilgan ikki baholari ham hech qayerga o'tmasligi sababli, bu richag ham qo'ldan ketgan. Sabr kosasi to'lgan paytda ayrimlar chora sifatida tayoq ishlatishga majbur bo'layotgani, aslida tizim o'qituvchini shunga olib borib qo'ygani ta'kidlandi. Rivojlangan davlatlarda tizimning o'z richagi borligi, o'qituvchi faqat xabar berishi, ota-onani chaqirish yoki ichki ishlarga olib borishni esa tizimning o'zi bajarishi qayd etildi.

Oilaviy muhit va tarbiya

Maktab rahbari Mavluda Nasriddinova muammoning ildizlaridan biri sifatida oilaviy muhit va ajrimlar ko'payganini qayd etdi. Mutaxassislarning fikricha, hozirgi kunda ba'zi bolalarga hatto ota-onaning ham so'zi o'tmayapti va bu maktabdagi tarbiya jarayoniga o'zining salbiy ta'sirini ko'rsatmoqda.