Midlberi institutining yubiley simpoziumi doirasida Termizga ilmiy safar uyushtirildi
O'zbekistonda o'tgan 10-Xalqaro simpozium doirasida jahonning yetakchi universitetlari olimlari Termiz shahriga tashrif buyurishdi.
Kuni kecha O'zbekistonda Midlberi xalqaro tadqiqotlar institutining 10-Xalqaro simpoziumi bo'lib o'tdi. Tadbir O'zbekiston Respublikasi Prezidenti huzuridagi Strategik va mintaqalararo tadqiqotlar instituti hamda Jahon iqtisodiyoti va diplomatiya universiteti hamkorligida tashkil etildi.
Jahon ilm-fan namoyandalari O'zbekistonda
Simpozium dasturi Toshkent, Samarqand, Buxoro va Termiz shaharlarini qamrab oldi. Nufuzli delegatsiya tarkibidan Garvard, Yel, Prinston, Berklidagi Kaliforniya universiteti, Oksford va Kembrij universitetlarining yetakchi xorijiy olimlari, tadqiqotchilari, doktorantlari hamda aspirantlari, shuningdek, AQSH Davlat departamentining sobiq xodimlari o'rin oldi. Ishtirokchilar qatorida Anna Vasileva, Dominik Liven, Brianna Todd, Maykl Reynolds, Yuriy Slezkin, Datse Dzenovska kabi mutaxassislar bor.
Termizga ilmiy-ma'rifiy sayohat
Safar davomida xorijlik olimlar va yosh tadqiqotchilar Buyuk ipak yo'li markazlaridan biri bo'lgan qadimiy Termizning madaniy merosi bilan tanishdilar. Ishtirokchilar Qora-tepa va Fayoztepa arxeologik majmualari, shuningdek, Termiz davlat arxeologiya muzeyida bo'ldilar. Shuningdek, dasturning alohida qismi Hakim at-Termiziy yodgorlik majmuasini ziyorat qilish bo'ldi.
Xalqaro hamkorlik va ta'lim maskanlari
Mehmonlar "Ayritom" xalqaro savdo markazi faoliyati bilan tanishib, transchegaraviy savdoni rivojlantirish uchun tadbirkorlar va mutaxassislarni tayyorlashga qaratilgan biznes maktabida ham bo'ldilar. Xorijlik mutaxassislar O'zbekiston siyosati mintaqani barqaror rivojlantirish, shu jumladan ta'lim va gumanitar jarayonlarga jalb qilishga qaratilganini ta'kidladilar.
Manba: UzA
