Mirzacho'l texnikumida ta'lim sifati va yoshlar bandligini ta'minlash borasida qanday ishlar amalga oshirilmoqda?
Mirzacho'l texnikumida 692 nafar o'g'il-qiz zamonaviy kasb-hunar va tillarni o'rganmoqda. Bitiruvchilarning bandligi to'liq ta'minlandi.
Mamlakatimizda yosh avlodni har tomonlama qo'llab-quvvatlash, ularga sifatli ta'lim berish hamda mustahkam kasbiy tayanch yaratish davlat siyosatining ustuvor yo'nalishiga aylangan. Bu borada 2016 yil 24 avgustda qabul qilingan "Yoshlarga oid davlat siyosati to'g'risida"gi Qonun muhim huquqiy asos bo'lib xizmat qilmoqda. O'tgan davr mobaynida mazkur qonun ijrosi doirasida kasbiy ta'lim tizimi bosqichma-bosqich isloh qilinib, yoshlarni mehnat bozori talablariga mos kadrlar etib tayyorlashga alohida e'tibor qaratilmoqda.
Zamonaviy texnikumlar faoliyati
Prezidentimizning 2025 yil 16 oktyabrdagi "Kasbiy ta'limda malakali kadrlar tayyorlash tizimini yanada takomillashtirish va xalqaro ta'lim dasturlarini joriy qilish chora-tadbirlari to'g'risida"gi farmoni asosida sobiq kasb-hunar kollejlari faoliyati tubdan yangilanib, zamonaviy texnikumlarga aylantirildi. Jumladan, mazkur hujjat ijrosi doirasida muassasa 2-sonli Mirzacho'l texnikumiga o'zgartirildi.
Ayni paytda ushbu ta'lim maskanida 692 nafar o'g'il-qiz tahsil olmoqda. Ularning 350 nafari kunduzgi bo'limda o'qisa, qolganlari ishlab chiqarish bilan uyg'unlashgan holda dual ta'lim shaklida bilim olmoqda. O'quvchilar uchun zamonaviy o'quv xonalari, laboratoriyalar, sport zali, stadion, faollar zali, boy kitob fondiga ega kutubxona hamda 50 o'rinli oshxona faoliyat yuritmoqda. Shuningdek, boshqa hududlardan kelgan o'quvchilar uchun 50 o'rinli yotoqxona bepul turarjoy bilan ta'minlaydi.
13 ta yo'nalish va xalqaro hamkorlik
Texnikumda yoshlar uchun 13 ta zamonaviy yo'nalish, jumladan, IT, kompyuter muhandisligi, dasturlash, maktabgacha ta'lim tarbiyachilari va uslubchilari hamda qishloq xo'jaligi mutaxassisliklari o'rgatilmoqda. O'tgan 2025 o'quv yilida ta'lim maskanini tamomlagan bitiruvchilarning bandligi 100 foiz ta'minlandi. Bu esa "ta'lim — kasb — ish o'rni" tamoyilining amaliy natijasidir.
- Nemis, ingliz, koreys va yapon tillari bo'yicha bepul kurslar tashkil etilgan.
- Har bir til yo'nalishidan o'ndan ortiq o'quvchi xalqaro sertifikatlarni qo'lga kiritdi.
- Sertifikatlash xarajatlari byudjetdan tashqari mablag'lar hisobidan qoplab berildi.
- Qozog'iston va Belarus Respublikasi bilan tuzilgan memorandumlar asosida tajriba almashinuvi yo'lga qo'yilib, Qozog'istondan uch nafar fuqaro dual ta'limda o'qimoqda.
Byudjetdan tashqari mablag'larni yo'naltirish
Ta'lim muassasasida kulolchilik, tikuvchilik va fitnes klubi faoliyati yo'lga qo'yilgan bo'lib, ular orqali tushadigan byudjetdan tashqari mablag'lar o'quvchilarga stipendiya to'lash hamda pedagog xodimlarning maoshiga ustamalar berish uchun sarflanmoqda. Bu esa o'qituvchilar mehnatini munosib rag'batlantirish va ta'lim sifatini yanada yuksaltirishga xizmat qilmoqda.
Manba: UzA
