Namanganda maktab maslahatchisi lavozimi uchun sinov jarayonlari boshlandi
Mamlakatimiz maktablarida yangi joriy etilgan maktab maslahatchisi lavozimi uchun nomzodlardan test sinovlari olinmoqda.
Prezidentning 2025 yil 8 sentyabrdagi maktabdan tashqari ta'lim tizimini rivojlantirishga qaratilgan qarori ijrosi doirasida davlat umumta'lim maktablarida maktab maslahatchisi lavozimi yo'lga qo'yildi. Shu munosabat bilan Namangan shahridagi 15-sonli umumta'lim maktabida nomzodlarni saralash maqsadida test sinovlari tashkil etildi.
Sinov jarayonlari va talablar
Viloyatdagi 700 dan ortiq ta'lim maskanlaridagi mavjud o'rinlar uchun jami 1240 nafar nomzod ro'yxatdan o'tgan. Namangan viloyati "Kelajak" markazi tomonidan o'tkazilayotgan imtihonlarda ishtirokchilarning kasbiy bilimlari, normativ-huquqiy hujjatlar bo'yicha savodxonligi hamda yoshlar bilan ishlash ko'nikmalari baholanmoqda. Ochiqlik va shaffoflik tamoyillari asosida o'tayotgan jarayonlarni tegishli mutaxassislar nazorat qilib bormoqda.
Nizom talablariga ko'ra, har bir ishtirokchiga 30 ta test topshirig'ini bajarish uchun 90 daqiqa vaqt ajratiladi. Eng yuqori ball to'plagan nomzodlar keyingi bosqich – suhbatda qatnashish huquqini qo'lga kiritadi. Suhbat natijalariga ko'ra saralab olingan eng munosib va tashabbuskor kadrlar maktab maslahatchisi vazifasiga tayinlanadi.
Manba: UzA
