Navoiy shahrida Prezident maktabiga kirish imtihonlarining ikkinchi bosqichi o'tkazildi

Navoiy shahridagi "Kimyogar" sport majmuasida Prezident maktabiga kirish imtihonlarining ikkinchi bosqichi doirasida test sinovlari tashkil etildi. Mazkur bosqichda dastlabki sinovdan muvaffaqiyatli o'tgan jami 480 nafar o'quvchi ishtirok etdi.

Navoiy shahridagi Prezident maktabi direktori Jo'rabek Aslonovning so'zlariga ko'ra, imtihon jarayonlarining shaffof hamda adolatli o'tishi uchun har tomonlama puxta tayyorgarlik ko'rilgan. Jumladan, barcha o'quvchilar to'liq Face ID tekshiruvidan o'tkazilgach, sinov jarayonlariga kiritilgan. Test materiallari imtihon boshlanishidan oldin maxsus qoplarda olib kelingan va xolislar ishtirokida ochilib, guruhlarga biriktirilgan mas'ul shaxslar tomonidan o'quvchilarga tarqatib berilgan.

Imtihon shartlari va vaqt taqsimoti

Sinov jarayonida o'quvchilarga ikkita fan bo'yicha topshiriqlar bajarish uchun vaqt ajratildi:

• Matematika: tanqidiy fikrlash va muammoni yechish bo'yicha 40 ta topshiriqqa 90 daqiqa vaqt berildi.
• Ingliz tili: grammatika va matn bilan ishlash bo'yicha 40 ta topshiriqqa 40 daqiqa ajratildi.

Ma'lum qilinishicha, Prezident maktablariga kirish sinovlarining ushbu ikkinchi bosqich natijalariga asosan, qatnashgan 480 nafar o'quvchidan faqat 24 nafari mazkur maktabga o'qishga qabul qilinadi.