Navoiy universiteti Janubiy Koreya OTMi bilan talabalar almashinuvini yo'lga qo'ymoqda
Navoiy davlat konchilik va texnologiyalar universiteti Janubiy Koreyaning Jeonbuk milliy universiteti bilan hamkorlik memorandumini imzoladi.
Xalqaro hamkorlik va talabalar uchun grantlar
Navoiy davlat konchilik va texnologiyalar universiteti hamda Janubiy Koreyaning Jeonju shahrida joylashgan Jeonbuk milliy universiteti rahbariyati o'rtasida onlayn muzokara tashkil etildi. Muloqot yakunida ikki oliy ta'lim dargohi o'rtasida hamkorlik kelishuvi imzolandi.
Imzolangan memorandum talaba va professor-o'qituvchilar almashinuvi qo'shma loyihalarini nazarda tutadi. Unga ko'ra, dastlabki bosqichda universitetning 10 nafar, kelgusida esa 40 nafargacha talabasining Janubiy Koreyada grant asosida tahsil olishini yo'lga qo'yish rejalashtirilgan. Ma'lumot uchun, Jeonbuk milliy universiteti Janubiy Koreyaning muhandislik, robototexnika, sun'iy intellekt, elektronika va materialshunoslik kabi texnologik yo'nalishlarda ilmiy tadqiqotlarga ixtisoslashgan nufuzli oliy ta'lim muassasalaridan biri hisoblanadi.
Maktab binosi mukammal ta'mirlanib, foydalanishga topshirildi
Navbahor tumanidagi 19-sonli umumiy o'rta ta'lim maktabida mukammal ta'mirlash va rekonstruksiya ishlari yakunlanib, o'quvchilar uchun qabul qilindi.
Maktabning mavjud 240 o'rinli o'quv binosi O'zbekiston Respublikasi Prezidentining 2024-yil 12-dekabrdagi “Navoiy viloyatini ijtimoiy-iqtisodiy rivojlantirish bo'yicha chora-tadbirlar to'g'risida”gi qaroriga muvofiq Islom taraqqiyot banki va xalqaro OPEK mablag'lari hisobidan yangilandi. Shuningdek, loyiha doirasida qo'shimcha ravishda 240 o'rinli o'quv binosi ham barpo etildi. Qiymati 3,6 milliard so'mni tashkil etgan qurilish-ta'mirlash ishlarini “Muzaffar Shahribonu poydevori” MCHJ amalga oshirdi. Amalga oshirilgan ishlar natijasida ta'lim muassasasining infratuzilmasi yaxshilanib, pedagoglar va o'quvchilar uchun xavfsiz hamda zamonaviy sharoitlar yaratildi.
Manba: UzA
