Navoiy va Xorazmda bolalarning ta'lim ehtiyojlarini baholash tizimi ishga tushirilmoqda
Ikki viloyatda 3-18 yoshdagi bolalarning alohida ta'lim ehtiyojlarini aniqlash va davlat ta'lim muassasalariga yo'naltirish tizimi bosqichma-bosqich joriy etiladi.
Ijtimoiy himoya milliy agentligi tomonidan Navoiy va Xorazm viloyatlaridagi «Inson» ijtimoiy xizmatlar markazlari huzurida Bolani kompleks baholash guruhlari tashkil etilmoqda.
Mazkur guruhlar 3-18 yoshdagi bolalarning alohida ta'lim ehtiyojlarini aniqlash bilan shug'ullanadi. Shuningdek, ular bolalarga mos ta'lim shakli va zarur qo'llab-quvvatlash choralarini belgilab, davlat ta'lim muassasalariga yo'naltiradi. Hududlarda jami 12 ta kompleks baholash guruhi xizmat ko'rsatishi ko'zda tutilgan.
Tizimning joriy etilish bosqichlari
Yangi tartib uch bosqichda amaliyotga tatbiq etiladi:
- 1-oktabrdan boshlab Navoiy va Urganch shaharlarida;
- 1-noyabrdan boshlab Karmana, Qiziltepa, Konimex, Yangibozor, Qo'shko'pir tumanlari va Xiva shahrida;
- 1-dekabrdan boshlab esa har ikki viloyatning qolgan tuman va shaharlarida.
Baholash jarayoni qanday kechadi?
Baholash jarayonida maxsus pedagog, psixolog va mahalladagi ijtimoiy xodim ishtirok etadi. Ular bolaning ta'lim olish imkoniyatlari, rivojlanishi, muloqoti, xulq-atvori hamda oilaviy va ijtimoiy muhitini har tomonlama o'rganadi. Mazkur jarayonga ota-ona yoki qonuniy vakil jalb etilib, zarurat tug'ilganda tibbiyot mutaxassislari ham qatnashadi.
Manba: Kun.uz
