Navoiy viloyatida birinchi sinf o'quvchilariga Prezident sovg'alari topshirilmoqda

Navoiy viloyatida 2026-2027 o'quv yilini yuqori saviyada kutib olish, maktablarni yangi o'quv mavsumiga tayyorlash va birinchi sinfga chiqadigan bolalar uchun qulay sharoitlar yaratish ishlari olib borilmoqda. Bolalarning ta'lim olishga bo'lgan ilk qadamlarini qo'llab-quvvatlash maqsadida berilayotgan "Prezident sovg'asi" ana shunday e'tiborning yorqin namunasidir.

22 mingdan ortiq bolajonlar uchun sovg'alar tayyorlandi

Yangi 2026-2027 o'quv yilida Navoiy viloyati bo'yicha jami 367 ta umumta'lim maktabining birinchi sinfiga 22 ming 209 nafar bola qabul qilinishi ko'zda tutilgan. Shunga ko'ra, adm.maktab.uz platformasi orqali ro'yxatdan o'tgan bo'lajak o'quvchilar uchun maxsus Prezident sovg'alari ta'lim muassasalariga bosqichma-bosqich tarqatilmoqda.

Ta'lim jihozlari jamlanmasi

Maktab yoshidagi bolajonlar uchun tayyorlangan "Prezident sovg'asi" to'plamidan jami 12 turdagi zarur o'quv qurollari joy olgan. Jumladan, bolalarga yangi o'quv sumkasi, 12 dona daftar, ruchka, oddiy hamda rangli qalamlar, rangli qog'oz, plastilin, rasm daftari, o'chirg'ich, akvarel bo'yoqlari, yelim va qalamdon taqdim etilmoqda.