Navoiy viloyatidagi o'qituvchi “Yil o'qituvchisi” tanlovida g'olib bo'ldi
Navbahor tumanidagi maktab boshlang'ich sinf o'qituvchisi Marhabo Saydullayeva “Yil o'qituvchisi” tanlovida g'olib chiqib, 616 million so'm mukofotni qo'lga kiritdi.
Navoiy viloyatining Navbahor tumanidagi 20-umumiy o'rta ta'lim maktabining boshlang'ich sinf o'qituvchisi Marhabo Saydullayeva mamlakatimizda ilk bor o'tkazilgan “Yil o'qituvchisi” tanlovining mutlaq g'olibi deb topildi. U ushbu muvaffaqiyat natijasida 616 million so'm mukofot bilan taqdirlandi.
Uch bosqichli sinovlar
Ma'lum qilinishicha, mazkur tanlov uch bosqichda tashkil etilgan. Birinchi saralash bosqichida respublika bo'ylab 46 mingdan ziyod pedagoglar qatnashib, shundan har bir tumandan eng yuqori natija ko'rsatgan 624 nafar o'qituvchi saralab olingan. Ikkinchi bosqichda ishtirokchilarning o'z fani bo'yicha dars o'tish mahorati hakamlar hay'ati tomonidan sinovdan o'tkazilib, eng yaxshi natija ko'rsatgan 2 nafar nomzod so'nggi bosqichga yo'llanma olgan.
Hal qiluvchi bosqichda esa pedagoglarning ma'naviy-ma'rifiy yo'nalishdagi ishlari hamda kitobxonlik darajasi baholangan. Yakuniy natijalarga ko'ra eng yuqori ballni to'plagan navoiylik boshlang'ich sinf o'qituvchisi g'oliblikni qo'lga kiritgan.
Ustozning erishgan yutuqlari
Pedagogika sohasida 10 yildan buyon faoliyat yuritib kelayotgan Marhabo Saydullayeva shu vaqt mobaynida bir qator yutuqlarga erishgan. U attestatsiya jarayonlarida muvaffaqiyatli qatnashib, oliy toifa hamda 70 foizlik ustamaga ega bo'lgan. Shuningdek, Vazir jamg'armasi va o'z yo'nalishi bo'yicha milliy sertifikat asosida 50 foizlik ustamalarni qo'lga kiritgan. 2021-yilda esa “Xalq ta'limi a'lochisi” ko'krak nishoni bilan taqdirlangan. O'tgan o'quv yilida u Prezident tashabbusi bilan Turkiyada malaka oshirib qaytgan. Uning o'quvchilari turli fan olimpiadalari va tanlovlarda faol qatnashib, ixtisoslashgan maktablarga muvaffaqiyatli kirib kelmoqda.
Manba: UzA
