Navoiyda bitiruvchi talabalarning bandligini ta'minlash va tadbirkorligini qo'llab-quvvatlash choralari ko'rilyapti

Navoiy davlat konchilik va texnologiyalar universitetida tadbirkorlik faoliyatini boshlash istagida bo'lgan bitiruvchi talabalar bilan uchrashuv tashkil etildi. Tadbirda talabalarning bandligini ta'minlash va ularni mehnat bozoriga integratsiya qilish masalalari muhokama qilindi.

Yoshlar tadbirkorligini qo'llab-quvvatlash chora-tadbirlari

Uchrashuvda universitet rektori Baxtiyor Mardonov, Yoshlar ishlari agentligi huzuridagi Yoshlar tadbirkorligini rivojlantirish davlat maqsadli jamg'armasi ijrochi direktori Mirzobek Qo'ldoshev hamda "O'zmilliybank" AJ vakillari ishtirok etdi. Oliy ta'lim muassasalari bitiruvchilarining ishga joylashishiga ko'maklashish bo'yicha Davlat rahbari tomonidan 2025-yil 14-fevralda imzolangan qaror bu borada dasturilamal vazifasini bajarayotgani ta'kidlandi.

Mazkur hujjat ijrosi doirasida "Kelajakka qadam" dasturi amalga oshirilmoqda. Tashabbus yoshlarning kasbiy faoliyatini boshlashi, tadbirkorlik salohiyatini oshirishi hamda moliyaviy savodxonligini yuksaltirishga qaratilgan. Shuningdek, talabalar uchun mo'ljallangan moliyaviy imtiyozlar va kredit ajratish tartib-qoidalari tushuntirildi.

Universitet bitiruvchilari va ajratilayotgan kreditlar

Ayni paytda oliygohda 5 ta fakultet va 21 ta kafedra faoliyat yuritib, 2025-2026 o'quv yilida kunduzgi va sirtqi ta'lim shakllarida 25 ta bakalavriat hamda 22 ta magistratura mutaxassisligi bo'yicha kadrlar tayyorlanmoqda. Rektor B.Mardonovning ma'lum qilishicha, joriy o'quv yilida 1736 nafar talaba o'qishni tamomlashi kutilmoqda. Ularni ish bilan ta'minlash maqsadida mehnat yarmarkalari va kasb ko'rgazmalari o'tkazilmoqda. Hozirga qadar 1111 nafar bitiruvchining bandligi ta'minlanib, ulardan 729 nafari doimiy ish o'rniga ega bo'ldi.

"O'zmilliybank" AJ Navoiy viloyat filiali bilan hamkorlikda "Kelajakka qadam" dasturi doirasida biznes rejalarni amalga oshirish ishlari olib borilmoqda. Xususan, 2025-2026 o'quv yilida 37 nafar talabaning biznes loyihalariga 935 million so'm miqdorida kredit ajratildi.

Bank tomonidan yoshlar uchun bir qancha kredit yo'nalishlari taqdim etiladi:

• "Tadbirkorlikka ilk qadam" yo'nalishida o'zini o'zi band qilmoqchi bo'lganlarga 20 million so'mgacha 6 oylik imtiyozli davr bilan kredit beriladi.
• "Biznes start", "Biznes progress" hamda ish o'rinlari yaratgan tadbirkorlar uchun "Talaba invest" portfellari mavjud.

Uchrashuv davomida talaba Madinabonu Toyirova Konimex tumanida ingliz tili, matematika, huquq va tarix fanlarini o'rgatuvchi o'quv markazi ochish rejalari borligini bildirib, bank kreditlari hamda jamg'arma ko'magi haqida kerakli ma'lumotlarga ega bo'ldi.