Nodavlat ta'lim muassasalarida tekshiruvlar xavf tahlili asosida amalga oshiriladi
Adliya vazirligida nodavlat ta'lim xizmatlari sohasida xavfni tahlil qilish elektron tizimini joriy etish nizomi ro'yxatdan o'tkazildi.
Adliya vazirligi nodavlat maktabgacha, umumiy o'rta va qo'shimcha ta'lim xizmatlarini ko'rsatish sohasida nazoratni amalga oshirishda «Xavfni tahlil qilish» elektron tizimini joriy etish tartibi to'g'risidagi nizomni davlat ro'yxatidan o'tkazdi.
Xavf darajasini baholash tartibi
Nizomga ko'ra, tadbirkorlik subyektlari faoliyatida qonunchilik buzilishi xavfi avtomatlashtirilgan tarzda baholanadi. Bunda davlat organlarining axborot tizimlari, statistik ma'lumotlar, jismoniy va yuridik shaxslar murojaatlari, ommaviy axborot vositalari hamda boshqa qonuniy manbalardan olingan ma'lumotlardan foydalaniladi.
Hujjatga muvofiq, xavf tahlili jarayonida tadbirkorlik subyektlaridan qo'shimcha hujjat yoki ma'lumotlar talab qilinishiga yo'l qo'yilmaydi.
Toifalarga ajratish va tekshiruvlar
Xavf darajasi nodavlat maktabgacha, umumiy o'rta va qo'shimcha ta'lim xizmatlari sohalari uchun belgilangan alohida mezonlar asosida aniqlanadi hamda subyektlar yuqori, o'rta va past xavf toifalariga ajratiladi.
Yuqori va o'rta xavf toifasiga kiruvchi subyektlarda qonunchilikka muvofiq profilaktika tadbirlari va tekshiruvlar tashkil etiladi. Past xavf toifasiga mansub muassasalarda esa tekshiruvlar o'tkazilmaydi.
Shu bilan birga, elektron tizim orqali aniqlangan xavf darajasi tadbirkorlik subyektiga nisbatan to'g'ridan to'g'ri ta'sir choralarini qo'llash uchun asos bo'lmaydi.
Manba: Kun.uz
