Nukuslik magistrant BMT granti tanlovida g'olib chiqdi
Nukus davlat pedagogika instituti magistranti BMT Taraqqiyot dasturining xalqaro tanlovida g'olib bo'lib, 8,5 ming dollar grant yutdi.
Ajiniyoz nomidagi Nukus davlat pedagogika instituti biologiya mutaxassisligi 1-kurs magistranti Lobarxon Yuldashova Birlashgan Millatlar Tashkiloti Taraqqiyot dasturining xalqaro tanlovida muvaffaqiyat qozondi. U “Qoraqalpog'iston Respublikasida Nitraria Sibirica o'simligining plantatsiyasini ishlab chiqish” nomli loyihasi bilan g'oliblikni qo'lga kiritdi. Mazkur loyihani hayotga tatbiq etish maqsadida 8 ming 500 AQSH dollari miqdorida grant mablag'i ajratildi.
Ilmiy izlanishlar va maqsadlar
Talaba qiz biologiya fanlari doktori, professor Alisher Ajiyev rahbarligida bir necha yildan buyon ilmiy-tadqiqot ishlarini olib bormoqda. Ular qurg'oqchilik hamda sho'rga chidamli bo'lgan Nitraria Sibirica, ya'ni oqchangal o'simligining bioekologik xususiyatlari va uning xalq xo'jaligidagi ahamiyatini o'rganib kelishmoqda.
Rejaga ko'ra, mazkur loyiha Qonliko'l tumanida bajariladi va boshlang'ich bosqichda ushbu o'simlik plantatsiyasini barpo etish ko'zlangan. Bu tashabbus Orolbo'yining degradatsiyaga uchragan yerlarini qayta tiklash, tuproq sho'rlanishining oldini olish, hududda ekologik barqarorlikni ta'minlash hamda yashil maydonlar hajmini kengaytirishga yo'naltirilgan.
Kelgusidagi rejalar va yutuqlar
Loyihaning navbatdagi bosqichida chet eldan zarur uskunalar keltirilishi rejalashtirilgan. Shuningdek, oqchangal o'simligidan mahalliy tabiiy eko-jem mahsulotini tayyorlash, uni ichki hamda tashqi bozorlarga yetkazib berish orqali olis hududlarda yangi iqtisodiy imkoniyatlar ochish asosiy maqsad qilib belgilangan.
Eslatib o'tamiz, Lobarxon Yuldashova shu kungacha bir qator respublika va xalqaro tanlovlarda muvaffaqiyatli qatnashgan. Jumladan, u 2023-2024 o'quv yilida Ibroyim Yusupov nomidagi davlat stipendiyasi tanlovi g'olibi bo'lgan.
Manba: UzA
