Oliy o'quv yurti bitiruvchilarini ish bilan ta'minlashning yangi mexanizmlari joriy etiladi

Joriy yilda mamlakatimiz oliygohlarini 320 ming nafar yoshlar tamomlashi kutilmoqda. Ushbu yo'nalishda 8 mingdan ortiq loyihalarni moliyalashtirish uchun 500 milliard so'm mablag' yo'naltirilib, 10 mingga yaqin yoshlarning bandligini ta'minlash rejalashtirilgan. Mazkur dastur tadbirkorlik subektlariga qo'shimcha moliyaviy imkoniyatlar yaratish orqali yanada kengaytirilishi ko'zda tutilgan. Shuningdek, ish beruvchilar va tadbirkorlarni faol jalb etgan holda "TalabaExpo-2026" kasb ko'rgazmalarini hududlarda samarali tashkil etish zarurligi ta'kidlandi.

Bandlik monitoringi va karera markazlari faoliyati

Barcha jarayonlar "career.edu.uz" platformasi orqali nazorat qilinib, mas masala mahalliy hokimliklar darajasigacha tushiriladi va vertikal tizim yo'lga qo'yiladi. OTMlar darajasida talabalarni band qilish bo'yicha quyidagi mexanizmlar taklif etildi:

• Barcha oliygohlarda karera markazlari to'liq ish boshlaydi va ularning ishi natijadorlikka qarab rag'batlantiriladi.
• Markazlar faoliyati "Bitiruvchi sifati indeksi" asosida baholanib, eng yuqori ko'rsatkich qayd etgan 20 ta oliygohning karera markaziga 500 million so'mdan ajratiladi.
• Oliygoh miqyosida 360 ta, fakultetlar kesimida 750 ta mehnat yarmarkalari o'tkaziladi.
• Har bir yo'nalish bo'yicha mingdan ortiq ish beruvchilar ishtirokida uchrashuvlar va vorkshoplar tashkil etiladi.

Tadbirkorlik va startap loyihalarni qo'llab-quvvatlash

2026/2027 o'quv yilidan boshlab talabalarda biznes ko'nikmalarini shakllantirish hamda mavjud imkoniyatlar bilan tanishtirish maqsadida barcha oliygohlarda "Tadbirkorlik asoslari" fani o'qitiladi. Shu bilan birga, talabalarning startap loyihalarini qo'llab-quvvatlash, ularni spin-off korxonalariga jalb etish, kafedralarning tarmoq korxonalarida o'z filiallarini ochishi hamda bitiruv malakaviy ishlarini bevosita ish beruvchi korxonalarda himoya qilish amaliyotini kengaytirish belgilandi.