Oliy o'quv yurtlaridagi energetika yo'nalishi ta'lim dasturlari yangilanadi
Oliygohlardagi yoqilg'i-energetika yo'nalishlari bo'yicha o'quv dasturlari to'liq yangilanib, talabalar dual ta'limga qamrab olinadi.
Iqtisodiyotni texnologik va innovatsion o'sish modeliga o'tkazish uchun barcha sohalarda, xususan, energetikada zamonaviy kadrlarga ehtiyoj borligi ta'kidlandi. Bugungi kunda 25 ta texnika oliygohida ushbu yo'nalish bo'yicha yiliga 5,5 ming nafar mutaxassis tayyorlanmoqda. Shunga qaramay, ta'lim amaliyot bilan bog'lanmagani sababli bitiruvchining ishga kirishib ketishiga 2-3 yil vaqt ketmoqda.
O'quv dasturlari va talablar
Mas'ullarga bir oy muddatda oliygohlardagi yoqilg'i-energetika yo'nalishlari bo'yicha ta'lim dasturlarini to'liq yangilash topshirildi. Shuningdek, 1 sentyabrga qadar laboratoriya va poligonlarni yangi talablarga moslashtirish ishlari boshlanishi belgilandi. Kelgusi 2-3 yilda quyosh va shamol generatorlari, elektr zaryadlash uskunalari kabi yo'nalishlarda minglab mutaxassislarga ehtiyoj paydo bo'lishi sababli yangi o'quv yilidan boshlab 3-kurs talabalarining yarmi, 4-kurs talabalarining barchasi dual ta'limga qamrab olinadi.
Texnikumlardagi yangi tajribalar
Saudiya Arabistonining ACWA kompaniyasi Shirin energetika texnikumini jihozlab, yiliga 220 nafar yoshni yangi kasblarga tayyorlamoqda. Yangi o'quv yilidan boshlab ushbu tajriba Qoraqalpog'iston, Buxoro va Navoiydagi bittadan texnikumda ham amaliyotga joriy etiladi.
Manba: Kun.uz
