Oliy ta'lim muassasalari bitiruvchilarining o'rtacha oylik maoshlari ma'lum qilindi

Oliy ta'lim bitiruvchilarining o'rtacha daromadlari

2025-yilning iyul va 2026-yil iyun oylari oralig'ida mamlakatimizdagi oliy ta'lim muassasalari bitiruvchilarining respublika bo'yicha o'rtacha rasmiy oylik daromadi 4,9 million so'mni tashkil etdi. Bu haqda Ta'lim sifatini ta'minlash milliy agentligi ma'lumot berdi.

Mutaxassislik yo'nalishlari bo'yicha taqqoslanganda, eng yuqori o'rtacha daromad ijod va sport sohalari vakillariga to'g'ri kelib, 6,33 million so'mni tashkil qilgan. Shuningdek, amaliy fanlar bitiruvchilari o'rtacha 5,5 million so'm, ijtimoiy-gumanitar yo'nalish bitiruvchilari 4,61 million so'm hamda tibbiyot yo'nalishini tamomlaganlar 4,43 million so'm miqdorida rasmiy daromad olishgan.

Yuqori ko'rsatkichga ega OTMlar

Bitiruvchilarining o'rtacha oyligi eng yuqori bo'lgan oliy ta'lim muassasalari ro'yxatidan quyidagilar o'rin oldi:

• Toshkentdagi S.A. Gerasimov nomidagi Butunrossiya davlat kinematografiya instituti filiali - 23,4 million so'm;
• Inha universiteti - 12,6 million so'm;
• Vestminster universiteti - 12,5 million so'm;
• Jahon iqtisodiyoti va diplomatiya universiteti - 10,6 million so'm;
• Toshkent davlat iqtisodiyot universiteti - 10,3 million so'm;
• Toshkent axborot texnologiyalari universiteti - 9,4 million so'm;
• Singapur menejmentni rivojlantirish instituti - 9,3 million so'm;
• Plexanov nomidagi Rossiya iqtisodiyot universiteti Toshkent filiali - 9 million so'm;
• Toshkent davlat yuridik universiteti - 8,4 million so'm;
• Navoiy davlat konchilik va texnologiyalar universiteti - 8,1 million so'm.

Hududlar kesimidagi ko'rsatkichlar

Hududlar bo'yicha tahlil qilinganda, bitiruvchilarning eng yuqori o'rtacha oylik daromadi Toshkent shahriga to'g'ri kelib, 6,6 million so'mni tashkil etgan. Navoiy viloyatida esa bu ko'rsatkich qariyb 5 million so'm bo'lgan. Kuchli uchlikni 4,96 million so'm o'rtacha oylik daromad bilan Toshkent viloyati yakunlagan.

Ma'lumot uchun, ushbu ko'rsatkichlarni hisoblashda faqat rasmiy qayd etilgan daromadlar inobatga olingan hamda bitiruvchining topgan mablag'i u yashayotgan hududdagi o'rtacha ish haqi bilan solishtirilgan.