Oliy ta'lim muassasalarida minglab yangi yotoqxona va o'quv o'rinlari ochildi

Oliy ta'lim, fan va innovatsiyalar vazirligi tomonidan mamlakatimizdagi 13 ta oliy ta'lim muassasasida bir vaqtning o'zida yangi o'quv binolari va zamonaviy talabalar turar joylari foydalanishga topshirildi. Yangi ob'ektlar jami 6 200 ta yotoqxona hamda 4 000 ta o'quv o'rnini o'z ichiga oladi. Ushbu ob'ektlarning ochilish marosimi Toshkent davlat iqtisodiyot universiteti markaziy maydonida tashkil etilgan onlayn teleko'prik orqali amalga oshirildi.

Hududlardagi oliygohlar bilan teleko'prik

Mazkur tadbirda tarmoq markazi sifatida Toshkent davlat iqtisodiyot universiteti va uning To'rtko'l fakulteti tanlandi. Onlayn teleko'prik vositasida Qoraqalpog'iston Respublikasi, Samarqand, Navoiy, Namangan, Sirdaryo, Farg'ona hamda Xorazm viloyatlaridagi oliy ta'lim muassasalari o'zaro bog'landi. Hududlardagi yangi o'quv binolari va talabalar uchun mo'ljallangan yotoqxonalar foydalanishga topshirilib, talabalarga qulay shart-sharoitlar yaratildi.