Urgut tumanidagi maktabda Karim Bahriyev nomidagi maxsus stipendiya ta'sis etildi

Urgut tumanidagi 8-umumiy o'rta ta'lim maktabida mazkur ta'lim maskanida o'qigan taniqli jurnalist, shoir va tarjimon Karim Bahriyev xotirasiga bag'ishlangan tadbir tashkil etildi.

Xotira kechasi va xotiralar

Tadbirda O'zbekiston Milliy axborot agentligi bosh direktori Abdusaid Ko'chimov, “Sharq yulduzi” jurnali bo'lim boshlig'i Muhammad Ismoil, “Qanot” loyihasi asoschisi Laziz Rahmatov va boshqa mas'ullar ishtirok etdi. Mehmonlar Karim Bahriyevning o'zbek adabiyoti hamda milliy jurnalistika rivojiga qo'shgan hissasi, uning qoldirgan ilmiy-adabiy merosi xususida to'xtalib o'tdilar. Xususan, uning uch tomli “Dunyo she'riyati antologiyasi” tarjimashunoslikdagi muhim voqea ekanligi e'tirof etildi. Shuningdek, maktab direktori Muhammad Tojiboyev marhum ijodkor G'o's qishlog'i va maktab faxri bo'lganini, ta'lim jarayonlarini takomillashtirishda doim maslahat berib turganini ta'kidladi.

Yangi stipendiya va tashabbuslar

Xotira kechasi davomida “Qanot” loyihasi asoschisi Laziz Rahmatov mazkur maktab o'quvchilari uchun Karim Bahriyev nomidagi maxsus stipendiya ta'sis etish tashabbusini bildirdi. Unga ko'ra, bir o'quv yili davomida ikki marta g'oliblar aniqlanib, ularga loyiha mablag'lari hisobidan stipendiya to'lab boriladi. Ushbu tashabbus maktab jamoasi hamda qishloq ahli tomonidan to'liq qo'llab-quvvatlandi.

Shuningdek, maktabda Karim Bahriyev kitoblari burchagi tashkil etilgan bo'lib, kelgusida qurilayotgan 550 o'rinli qo'shimcha o'quv binosidagi sinfxonalardan biriga uning nomini berish rejalashtirilgan. Tadbir yakunida ta'lim dargohiga 200 dan ortiq badiiy adabiyotlar va jurnallar taqdim etildi.