Oliy ta'lim talabalari va ish beruvchilar hamkorligi tartibi tasdiqlandi

O'zbekiston Respublikasi Vazirlar Mahkamasi tomonidan oliy ta'lim muassasalari bitiruvchilarini ishga joylashtirish jarayonida kadrlar buyurtmachilari ishtirokini kuchaytirishga qaratilgan qaror qabul qilindi. Hujjatga asosan, vazirlik, idora va turli tashkilotlarning kadrlar tayyorlash bo'yicha bergan buyurtmalari asosida ikkinchi hamda undan yuqori kurs talabalarini tanlab olish amaliyoti yo'lga qo'yiladi.

Uch tomonlama shartnoma va to'lovlar

Qaror bilan tasdiqlangan nizomga ko'ra, ish beruvchi, oliy ta'lim tashkiloti va talaba o'rtasida uch tomonlama shartnoma tuziladi. Unga muvofiq, ish beruvchi o'qishni tamomlagandan so'ng ishlab berish sharti bilan talabaning kontrakt to'lovlarini to'lab beradi. Shuningdek, talabani o'qishni tugatgach kafolatli ishga qabul qilish mexanizmlari belgilanmoqda.

Talabalar faoliyatini nazorat qilish va o'qish jarayoni

Ish beruvchi korxona va tashkilotlar talabaning fanlarni o'zlashtirish darajasini har bir semestr yakuni bo'yicha nazorat qilib boradi. Bundan tashqari, asosiy fanlardan tashqari ish beruvchi talabiga ko'ra qo'shimcha o'quv modullari tanlov fani sifatida kiritilib, ushbu fanlar uchun talabaga kredit ballari beriladi. Talabaning bitiruv malakaviy ishi mavzusi ham ish beruvchining takliflari, uning faoliyati yoki investitsiya loyihalariga oid masalalardan kelib chiqqan holda belgilanadi.