Oliy ta'lim tizimida zamonaviy bakalavriat va magistratura yo'nalishlari tasdiqlandi
Oliy ta'lim yo'nalishlari va mutaxassisliklari klassifikatoriga o'zgartirish va qo'shimchalar kiritilib, Adliya vazirligida ro'yxatdan o'tkazildi.
Oliy ta'lim, fan va innovatsiyalar vazirining buyrug'i asosida oliy ta'lim yo'nalishlari hamda mutaxassisliklari klassifikatoriga tegishli o'zgartirish va qo'shimchalar kiritildi. Mazkur hujjat Adliya vazirligida davlat ro'yxatidan o'tkazildi.
Bakalavriat va magistratura uchun yangi mutaxassisliklar
Yangi tartibga ko'ra, bakalavriat bosqichida ekologiya va atrof-muhit, yashil iqtisodiyot, iqlim o'zgarishi, qayta tiklanuvchi energiya, suv resurslarini boshqarish, mobil robototexnika, uchuvchisiz uchish apparatlari (dronlar), barqaror qishloq xo'jaligi, ekoturizm hamda temir yo'l muhandisligi kabi zamonaviy yo'nalishlar bo'yicha mutaxassislar tayyorlash yo'lga qo'yiladi.
Magistratura bosqichida esa xalqaro energetik siyosat, xalqaro suv diplomatiyasi, sirkulyar iqtisodiyot, barqaror moliya, rivojlanish iqtisodiyoti, ekologiya huquqi, xalqaro savdo huquqi, nazariy va muhandislik fizikasi, urbanistika, barqaror shaharsozlik, iqlimga chidamli o'rmon xo'jaligi va barqaror turizm kabi yangi mutaxassisliklar joriy etildi.
Klassifikatordagi o'zgarishlar va yangilanishlar
Shuningdek, hujjat doirasida klassifikatordagi ayrim mavjud yo'nalishlarning nomlari ham yangilandi. Jumladan, 760-pozitsiyadagi bakalavriat yo'nalishi «Xizmat faoliyatini tarbiyaviy-psixologik ta'minlash» deb qayta nomlandi. 766-pozitsiyadagi magistratura mutaxassisligi esa «Davlat va harbiy boshqaruv» nomi bilan tasdiqlandi. Bundan tashqari, 799-pozitsiya klassifikatordan chiqarildi.
Manba: Kun.uz
