O'zbekistonda davlat-xususiy sheriklik asosida talabalar turar joylarini qurish tartibi o'zgardi

Hukumat qaroriga muvofiq, davlat-xususiy sheriklik asosida talabalar turar joylarini barpo etish hamda moliyalashtirish tizimi yangilandi. Endilikda tadbirkorlar davlat bilan sheriklikda zamonaviy yotoqxonalar quradi, davlat esa bu jarayonni moliyaviy jihatdan qo'llab-quvvatlaydi.

Yangi tartib va moliyalashtirish shartlari

Qabul qilingan tartibga asosan, davlat-xususiy sheriklik asosidagi loyihalar kamida 200 o'rinli talabalar turar joylari uchun amalga oshiriladi. Shu bilan birga, belgilangan limit doirasida har bir yotoq o'rni uchun qurilish xarajatlarining 50 foizigacha subsidiya ajratilishi ko'zda tutilgan. Yotoqxona uchun to'lov miqdori davlat va xususiy sherik o'rtasidagi kelishuvga ko'ra belgilanadi.

Davlat qabul komissiyasi orqali joylashtirilgan talabalar uchun yotoqxonani saqlash hamda foydalanish xarajatlarining 50 foizigacha bo'lgan qismi davlat byudjeti hisobidan qoplab beriladi. Agar yotoqxonada bo'sh o'rinlar qoladigan bo'lsa, ularga boshqa oliy ta'lim tashkilotlari talabalarini ham joylashtirishga ruxsat etiladi.

Qoshimcha imkoniyatlar va cheklovlar

Tadbirkorlarga yotoqxona uchun ajratilgan yer maydonida shartnomada belgilangan yotoq o'rinlaridan tashqari bo'sh maydonlardan tadbirkorlik faoliyati uchun foydalanishga ham imkon beriladi. Davlat subsidiyalari maxsus elektron platforma orqali talabalarning biometrik identifikatsiyasi asosida hisoblab chiqiladi.

Shuningdek, 2026 yil 1 iyuldan boshlab davlat oliy ta'lim muassasalari buyurtmasi asosida tadbirkorlar tomonidan 50 o'rinli yangi yotoqxonalarni qurish amaliyoti to'xtatiladi. Biroq avval boshlangan loyihalar amaldagi bitimlar muddati tugaguniga qadar o'z faoliyatini davom ettiradi.