Oliy ta'limda ingliz tilini o'qitishni rivojlantirish masalalari muhokama qilindi

O'zbekistonda oliy ta'lim tizimida ingliz tilini o'qitish sifatini yanada oshirish hamda o'quv jarayoniga zamonaviy raqamli texnologiyalar va sun'iy intellekt imkoniyatlarini jalb etish masalalariga bag'ishlangan uchrashuv bo'lib o'tdi. Oliy ta'lim, fan va innovatsiyalar vazirining birinchi o'rinbosari Sardor Rajabov EFEKTA Education kompaniyasining katta vitse-prezidenti Benjamin M.Xoup bilan muzokara o'tkazdi.

Hamkorlik yo'nalishlari va sun'iy intellekt

Muloqot davomida talabalarning xorijiy tillarni, xususan, ingliz tilini mukammal egallashi ularning kelgusidagi akademik va kasbiy imkoniyatlarini kengaytirishda muhim omil ekanligi alohida ta'kidlandi. Tomonlar ta'lim jarayonini zamonaviy texnologiyalar asosida individuallashtirish, yoshlarning bilim va ko'nikmalarini rivojlantirish hamda umumiy natijadorlikni oshirishga qaratilgan yondashuvlarni atroflicha muhokama qilishdi.

Shu bilan birga, EFEKTA Education kompaniyasining sun'iy intellektga tayanuvchi ta'lim platformasidan mamlakatimiz oliy o'quv yurtlarida foydalanish imkoniyatlari ko'rib chiqildi. Muzokaralar yakunida mazkur sohada o'zaro hamkorlikni davom ettirish, ilg'or raqamli yechimlarni ta'lim jarayoniga tatbiq etish hamda talabalar uchun chet tillarini o'rganishda yangi imkoniyatlarni yaratish bo'yicha kelishuvga erishildi.