O'qituvchilar sudga murojaat qilishda davlat bojidan ozod etilganmi?
O'zbekistonda pedagoglar kasbiy faoliyati davomida o'z huquqlarini himoya qilish uchun sudga murojaat qilganda davlat bojidan ozod qilinadi.
Konstitutsiyaning 52-moddasiga binoan, o'qituvchilar mehnati jamiyat va davlatni rivojlantirish, sog'lom hamda barkamol avlodni shakllantirish, xalqning ma'naviy va madaniy salohiyatini saqlash hamda boyitish asosi sifatida e'tirof etiladi.
Toshkent davlat yuridik universiteti Yuridik klinikasi xodimi Aygerim Aripbayevaning tushuntirishicha, "Davlat boji to'g'risida"gi qonunga muvofiq pedagoglar davlat bojini to'lashdan ozod etilgan. Jumladan, mazkur qonunning 8-moddasi 5-prim 2-bandida fuqarolik ishlari bo'yicha sudlarda pedagog xodimlar o'z kasbiy faoliyatini amalga oshirish vaqtida sha'ni, qadr-qimmati hamda ishchanlik obro'sini himoya qilish bilan bog'liq da'volar yuzasidan davlat bojidan ozod qilinishi belgilangan.
Shuningdek, qonunning 10-moddasi 19-bandiga muvofiq, pedagoglar o'z kasbiy faoliyatini bajarish chog'ida ularning huquqlarini buzayotgan davlat organlarining g'ayriqonuniy qarorlari hamda mansabdor shaxslarning harakatlari yoki harakatsizligi ustidan ma'muriy sudga shikoyat kiritganda ham davlat bojidan ozod etiladi.
Manba: UzA
