Jizzaxda O'qituvchi va murabbiylar kuni munosabati bilan ilg'or pedagoglar taqdirlandi

Jizzax viloyat hokimligi anjumanlar saroyida O'qituvchi va murabbiylar kuni umumxalq bayrami munosabati bilan tantanali tadbir bo'lib o'tdi. Unda ta'lim-tarbiya sohasida samarali mehnat qilib, yosh avlodga sifatli bilim berish yo'lida faoliyat olib borayotgan pedagoglar ishtirok etdi. Jizzax viloyat hokimi Ulug'bek Mustafoyev ustozlarni kasb bayrami bilan tabriklab, sohada amalga oshirilayotgan ishlar va erishilgan natijalarga alohida to'xtaldi.

Davlat mukofotlari va rag'batlar

Prezident farmoniga muvofiq, bir guruh jizzaxlik pedagoglar faxriy unvon, orden va medallar bilan taqdirlandi. Jumladan:

• Zomin tumanidagi 1-maktab jamoatchilik kengashi raisi Ismatulla Raimovga “O'zbekiston Respublikasida xizmat ko'rsatgan yoshlar murabbiysi” faxriy unvoni berildi.
• Jizzax davlat pedagogika universiteti tabiiy fanlar fakulteti dekani Zuhra Yaxshiyeva I darajali “Sog'lom avlod uchun” ordeni bilan mukofotlandi.
• Yangiobod tumanidagi 7-maktab direktori Tal'at Sulaymonov, Do'stlik tumanidagi 10-maktab o'qituvchisi Barno Alibayeva hamda Sharof Rashidov tumani ixtisoslashtirilgan maktabining o'qituvchisi Hasan G'iyosov “Shuhrat” medali bilan taqdirlandi.

Shuningdek, “Yil o'qituvchisi – 2026” ko'rik-tanlovi g'oliblariga 616 million so'mdan pul mukofoti topshirildi. Bitiruvchilarning oliy ta'limga kirish ko'rsatkichlari yuqori bo'lgan 3 ta tumanga 100 million so'mdan, 13 ta maktabga 100 million so'mdan va 13 nafar sinf rahbariga 30 million so'mdan pul mukofotlari berildi.

Ta'limdagi ijobiy o'zgarishlar

Viloyatda so'nggi o'n yilda maktabgacha ta'lim bilan qamrov darajasi 16 foizdan 79 foizga, maktab bitiruvchilarining oliy ta'limga qamrovi esa 7 foizdan 40 foizga yetdi. Joriy yilda 1318 nafar bitiruvchi oliy ta'limga kirish imtihonlarida 150 balldan yuqori natija ko'rsatdi, 304 nafari esa 189,9 ball to'pladi.

Tadbir davomida pedagoglarni qo'llab-quvvatlashga qaratilgan yangi tashabbuslar ham e'lon qilindi. Unga ko'ra, o'quv yili yakunida eng yaxshi 100 nafar fan o'qituvchisiga sihatgohlarda dam olish uchun bepul yo'llanmalar beriladi, 1 ming nafar faol pedagogning Islom sivilizatsiyasi markaziga sayohati tashkil etiladi. Shuningdek, respublika yoki xalqaro fan olimpiadalarida o'quvchisi birinchi o'rinni egallagan ustozlarni xorijiy davlatlarga sayohatga yuborish amaliyoti yo'lga qo'yilishi ma'lum qilindi.