O'qituvchilar va kasbiy ta'lim ustalarining sertifikat xarajatlari qoplab beriladi
2026 yil 1 iyuldan boshlab xalqaro va milliy kasbiy sertifikatlarni olgan o'qituvchilar hamda ustalarga sarflangan xarajatlarning yarmi qoplanadi.
O'zbekistonda ijtimoiy qo'llab-quvvatlash, ta'lim sifati va bandlikni oshirishga qaratilgan yangi qarorlar qabul qilindi. Ushbu o'zgarishlar 2026 yildan boshlab o'qituvchilar hamda boshqa soha vakillari uchun yangi imkoniyatlarni yaratadi.
Kasbiy ta'limni qo'llab-quvvatlash choralari
Eng muhim e'tibor kasbiy ta'lim sohasiga qaratilmoqda. Xususan, 2026 yil 1 iyuldan 2028 yil 1 yanvarga qadar Bandlikka ko'maklashish davlat jamg'armasi mablag'lari hisobidan ta'lim sifatini oshirishga qaratilgan yangi subsidiyalar amaliyotga kiritiladi. Bu tartibga ko'ra, o'qituvchilar va ishlab chiqarish ta'limi ustalariga xalqaro darajada tan olingan hamda milliy kasbiy sertifikatlarni olish uchun qilgan xarajatlarining 50 foizi qoplab beriladi. Bunda ajratiladigan mablag' bazaviy hisoblash miqdorining 20 baravarigacha bo'lishi belgilangan.
Bundan tashqari, malakani baholash markazlarini tashkil etgan tadbirkorlarga xarid qilingan baholash vositalari xarajatlarining 30 foizi miqdorida subsidiya ajratiladi. Ushbu ko'mak summasi bazaviy hisoblash miqdorining 200 baravaridan oshmasligi kerak.
Qonunchilikdagi boshqa o'zgarishlar
Qarorga muvofiq, 2026 yil 1 martdan boshlab Ijtimoiy reyestrga kiritilgan hamda I guruh nogironligi bo'lgan va mehnatga layoqatli a'zosi mavjud bo'lmagan oilalarning uy-joy sharoitini yaxshilash ishlari amalga oshiriladi. Shuningdek, og'ir toifadagi tumanlarda oilaviy tadbirkorlikni rivojlantirish dasturlari doirasida kreditlar yillik 12 foiz stavkada beriladi.
Manba: UzA
