Toshkent davlat agrar universitetida amaliyot va o'qish jarayoni tubdan isloh qilinadi
Toshkent davlat agrar universitetida talabalarni traktorchi-mashinist va agrodron foydalanuvchisiga o'qitish, o'qish muddatini qisqartirish hamda amaliyot tizimini kuchaytirish rejalashtirilmoqda.
O'zbekistonda qishloq xo'jaligi sohasida kadrlar tayyorlash tizimini takomillashtirish va ta'lim sifatini oshirish bo'yicha muhim chora-tadbirlar belgilandi. Xususan, Toshkent davlat agrar universitetida hozirda 13,6 ming nafar talaba ta'lim olayotgan bo'lsa-da, o'quv jarayonining amaliyot bilan yetarlicha bog'lanmagani sababli bitiruvchilarning atigi 55 foizi o'z sohasida ishlayotgani qayd etildi.
Shu munosabat bilan ta'lim, ilmiy tadqiqot va ishlab chiqarishni uzviy bog'laydigan tizim yaratish, mehnat bozori talabiga mos yetuk mutaxassislar tayyorlash vazifalari belgilandi. Kelgusida universitet talabalarining 6,8 ming nafari ishlab chiqaruvchi tashkilotlar, korxonalar va agroklasterlarda, 2,6 mingdan ziyodi Qishloq xo'jaligi vazirligi tizimidagi 22 ta ilmiy-tadqiqot institutida amaliyot o'tashi ko'zda tutilgan.
Shuningdek, fermer hamda uning xodimlari farzandlarining test sinovlarida ballari qabul parametrlariga yetmaganda, miqdori kamaytirilgan to'lov-kontrakt asosida universitetga qabul qilish, yettita ta'lim yo'nalishi bo'yicha o'qish davomiyligini 4 yildan 3 yilga qisqartirish taklif etildi. Shuning bilan birga, talabalarni traktorchi-mashinist guvohnomasi va agrodronlardan foydalanishga o'qitish yo'lga qo'yiladi.
Manba: Kun.uz
