O'zbekiston davlat jismoniy tarbiya va sport universitetida rektor va yoshlar uchrashuvi bo'lib o'tdi
O'zbekiston davlat jismoniy tarbiya va sport universitetida rektor va talaba-yoshlar o'rtasida ochiq muloqot tashkil etildi.
Globallashuv va turli xatarlar kuchayib borayotgan hozirgi davrda yosh avlod tarbiyasiga alohida e'tibor qaratish hamda ularni salohiyatli qilib voyaga yetkazish mamlakatimizda ustuvor yo'nalishlardan biri sanaladi. Shu munosabat bilan O'zbekiston davlat jismoniy tarbiya va sport universitetida navbatdagi “Rektor va talaba-yoshlar uchrashuvi” bo'lib o'tdi.
Tadbir avvalida davlatimiz rahbari ilgari surgan ta'lim va tarbiya masalalariga oid tashabbuslarning ahamiyati alohida ta'kidlandi. Xususan, zamonaviy dunyoda yoshlar ongiga salbiy ta'sir ko'rsatuvchi internetga qaramlik, diniy radikalizm hamda tavakkalchilikka asoslangan o'yinlarning xavf-xatarlari haqida atroflicha tushuntirishlar berildi.
Universitet rektori Rashid Matkarimov yurtimizda yoshlar uchun yaratilayotgan keng shart-sharoitlar, amalga oshirilayotgan bunyodkorlik jarayonlari hamda talabalarning bu boradagi yutuqlari xususida to'xtalib o'tdi. Shuningdek, muloqot davomida mamlakatimizdagi tinchlik va inson qadr-qimmatiga bag'ishlangan videorolik namoyish etildi.
Ochiq va samimiy ruhda o'tgan muloqot chog'ida talabalarni qiziqtirgan masalalar tinglanib, bildirilgan takliflar yuzasidan mutasaddilarga aniq vazifalar yuklatildi. Tomonlar bunday uchrashuvlarni kelgusida ham muntazam o'tkazib borishga kelishib olishdi. Yakunda ta'lim, tarbiya va bilim mamlakat taraqqiyoti hamda farovonligining asosiy poydevori ekani yana bir bor e'tirof etildi.
Manba: UzA
