O'zbekiston maktablarida fransuz tili darsliklari yangilanadi va xalqaro imtihonlar joriy etiladi

O'zbekistonda xorijiy tillarni o'qitish sifatini xalqaro talablar asosida yaxshilash yo'lida yangi qadam tashlandi. Maktabgacha va maktab ta'limi vazirligi vakillarining Fransiyaga safari davomida qator muhim kelishuvlarga erishildi. Bu hamkorlik fransuz tili ta'limini yangi bosqichga olib chiqish, o'qituvchilarning kasbiy salohiyatini oshirish hamda baholash tizimini rivojlantirishga xizmat qiladi.

“Hachette Livre” nashriyoti bilan kelishuv

Vazirning birinchi o'rinbosari Sherzod Karimov Fransiyaning yetakchi “Hachette Livre” nashriyot guruhi rahbariyati bilan 2027–2030-yillarga mo'ljallangan rasmiy shartnoma imzoladi. Unga ko'ra, 1–11-sinf o'quvchilari uchun mo'ljallangan “Passe-Passe” hamda “Imagine” fransuz tili darsliklari mamlakatimiz ta'lim tizimi, madaniy muhiti va milliy qadriyatlariga moslashtiriladi.

Kelishuvga asosan, 2027–2028 o'quv yilining o'zida 190 mingdan ortiq darslik va ish daftarlari respublika maktablariga yetkazib berilishi rejalashtirilgan. Ma'lumot uchun, 1826-yilda asos solingan “Hachette Livre” dunyoning 100 dan ortiq davlatida faoliyat yuritib, har yili millionlab o'quv adabiyotlarini nashr etadi.

Xalqaro sertifikatlar va leyblni joriy etish

Tashrif doirasida “France Education International” bosh direktori Anri Zermak bilan ham muzokaralar o'tkazildi. Uchrashuvda fransuz tili ta'limini rivojlantirish bilan birga, O'zbekistonda xalqaro DELF va DALF imtihonlarini yanada keng joriy etish masalalari muhokama qilindi.

Shuningdek, fransuz tili chuqur o'qitiladigan maktablarga beriladigan maxsus “France Education” leyblini kengaytirish imkoniyatlari ham ko'rib chiqildi. Ushbu maqom maktablarning xalqaro talablarga muvofiq faoliyat olib borayotganini tasdiqlovchi asosiy mezonlardan biri hisoblanadi. Mazkur tashabbuslar mamlakatimizda ko'p tilli ta'lim muhitini yaratish va yoshlarning xalqaro imkoniyatlarini kengaytirishga yo'naltirilgan.