O'zbekiston va Tojikiston oliy ta'lim muassasalari hamkorlikni kengaytirmoqda
O'zbekiston va Tojikiston oliy ta'lim va ilm-fan yo'nalishida akademik almashinuv, qo'shma ta'lim dasturlari hamda ilmiy tadqiqotlarni rivojlantirmoqda.
O'zbekiston va Tojikiston o'rtasidagi ta'lim va ilm-fan yo'nalishidagi aloqalar yangi bosqichga ko'tarilib, ikki davlat rahbarlarining muloqotlari natijasida strategik sheriklikning muhim yo'nalishiga aylandi. 2025-yilga kelib universitetlar o'rtasida yigirmadan ortiq memorandumlar imzolanib, o'zaro akademik almashinuv, qo'shma ilmiy tadqiqotlar hamda 2+2 va 1+1 kabi qo'shma ta'lim dasturlari amalda tatbiq etilmoqda.
Oliy o'quv yurtlari o'rtasidagi aloqalar
Ikki mamlakat OTMlari o'rtasida professor-o'qituvchilar va talabalar almashinuvi, xalqaro konferensiyalar, magistratura hamda doktorantura dasturlari bo'yicha ishlar olib borilmoqda. Shuningdek, zamonaviy ta'lim texnologiyalarini tatbiq etish, raqamli platformalarni rivojlantirish va ilmiy natijalarni amaliyotga joriy qilish borasida tajriba almashinuvi yo'lga qo'yilgan.
Buxoro davlat texnika universiteti ham bu borada faol qatnashib, xalqaro hamkorlikni rivojlantirishni asosiy vazifa deb biladi. Universitet rektori Sadoqat Siddiqova ta'kidlaganidek, Tojikistonga uyushtirilgan safarlar chog'ida qator nufuzli oliygohlar bilan kelishuvlarga erishilgan. Jumladan, Akademik M.S. Osimiy nomidagi Tojikiston texnika universiteti, Tojikiston texnologiyalar universiteti hamda Ko'lob texnologiyalar va innovatsion menejment instituti bilan sheriklik o'rnatilgan.
Qo'shma dasturlar va istiqbollar
Imzolangan hujjatlar o'quv jarayonini takomillashtirish, metodik tajriba almashish, malakali kadrlar tayyorlash va ilmiy izlanishlarni rivojlantirishga xizmat qiladi. Xususan, 2+2 va 1+1 formatidagi qo'shma dasturlar asosida bakalavriat va magistratura bosqichlarida mutaxassislar tayyorlash ishlari boshlangan. Ushbu qo'shma loyihalar yoshlarning salohiyatini oshirish hamda mintaqada ilm-fan taraqqiyotini ta'minlashda muhim ahamiyat kasb etmoqda.
Manba: UzA
