O'zbekiston va Tojikiston oliy ta'lim muassasalari rektorlarining uchinchi forumi o'tkazildi
Dushanbe shahrida O'zbekiston va Tojikiston oliy ta'lim muassasalari rektorlarining III forumi bo'lib o'tdi.
Tojikiston Respublikasining Dushanbe shahrida O'zbekiston va Tojikiston oliy ta'lim muassasalari rektorlarining III forumi bo'lib o'tdi. Sadriddin Ayniy nomidagi Tojikiston davlat pedagogika universitetida tashkil etilgan nufuzli anjumanda O'zbekiston Respublikasi Oliy ta'lim, fan va innovatsiyalar vazirligi hamda Tojikiston Respublikasi Ta'lim va fan vazirligi rahbarlari, yetakchi OTM rektorlari, olimlar va ekspertlar qatnashdi. Tadbir davomida ta'lim tizimini takomillashtirish, qo'shma ilmiy izlanishlarni kengaytirish hamda innovatsion ishlanmalarni amaliyotga tatbiq etish masalalari muhokama qilindi.
Hamkorlik kelishuvlari
Anjuman doirasida ikki tomonlama qator hujjatlar imzolandi. Xususan, Jizzax politexnika instituti va Tojikiston energetika instituti o'rtasida o'zaro hamkorlik memorandumi imzolandi. Mazkur hujjat ta'lim, ilm-fan va innovatsiyalar yo'nalishidagi aloqalarni mustahkamlashga qaratilgan bo'lib, qo'shma ta'lim dasturlarini yo'lga qo'yish, ilmiy-tadqiqot loyihalarini amalga oshirishni ko'zda tutadi.
Shuningdek, memorandum doirasida professor-o'qituvchilar hamda talabalar almashinuvini tashkil etish, energetika va muhandislik sohalarida ilg'or tajribalarni o'rganish rejalashtirilgan. Bu esa malakali mutaxassislar tayyorlash sifatini oshirishga xizmat qiladi.
Madaniy dastur
Tadbir doirasida ishtirokchilar uchun Tojikiston milliy hunarmandchiligi namunalari ko'rgazmasi ham tashkil etildi. Unda an'anaviy kashtachilik san'ati, milliy matolar, qo'l mehnati bilan tayyorlangan bezak buyumlari va amaliy san'at namunalari namoyish etilib, mehmonlarda katta qiziqish uyg'otdi.
Manba: UzA
