O'zbekistonda davlat OTM rahbarlarini tayyorlovchi "Rektorlar maktabi" ochiladi
2026-yil 1-iyuldan "Yangi O'zbekiston" universitetida davlat oliy ta'lim tashkilotlari rektorlari nomzodlarini tayyorlovchi dastur ish boshlaydi.
Vazirlar Mahkamasining qaroriga asosan, 2026-yil 1-iyuldan e'tiboran "Yangi O'zbekiston" universitetida "Rektorlar maktabi" dasturi o'z faoliyatini boshlaydi. Mazkur tashabbus davlat oliy ta'lim muassasalari rektorlari hamda direktorlari lavozimlariga munosib nomzodlar zaxirasini yaratish maqsadini ko'zlaydi.
Nomzodlarga qo'yiladigan talablar va tanlov
Dasturga yoshi 30 ga yetgan, magistr darajasiga ega, oliy ta'lim tizimida kamida 5 yillik staji bor va shundan 2 yilini rahbarlik lavozimlarida o'tkazgan mutaxassislar ochiq tanlov asosida jalb etiladi. O'quv jarayoni onlayn hamda offlayn shakllarda olti oygacha bo'lgan muddatda olib boriladi. Har yili 80 nafar tinglovchi o'qishga qabul qilinadi. O'qish davrida ishtirokchilarning asosiy ish joyidagi maoshi va lavozimi to'liq saqlab qolinadi.
Xorijiy malaka oshirish va zaxiraga kiritish
Dasturni yakunlagan eng iqtidorli 40 nafargacha tinglovchi AQShning Garvard universiteti yoki boshqa nufuzli xorijiy OTMlarga malaka oshirishga yo'naltiriladi. O'qishni muvaffaqiyatli bitirganlarga maxsus sertifikat berilib, Oliy ta'lim, fan va innovatsiyalar vazirligi tomonidan shakllantiriladigan rektorlar zaxirasiga kiritiladi. Kelgusida davlat OTMlari rahbarligiga faqatgina ushbu zaxiradagi shaxslar orasidan nomzodlar tanlab olinadi. Barcha xarajatlar, jumladan, xorijdagi malaka oshirish jarayonlari ham Davlat byudjeti mablag'lari hisobidan moliyalashtiriladi.
Manba: UzA
