O'zbekistonda “Jasorat maktablari”ga saralash imtihonlarining navbatdagi bosqichi boshlandi
Respublika bo'ylab “Jasorat maktablari”ga qabul imtihonlarining ikkinchi bosqichiga start berildi.
Mamlakatimizda “Jasorat maktablari”ga qabul qilish jarayonlari qizg'in davom etmoqda. Ushbu ta'lim maskaniga o'quvchilarni saralab olish faqatgina bilimni emas, balki intizom, jismoniy tayyorgarlik va matonatni ham talab etadi. Shu sababli har bir sinov kelgusida Vatan himoyasiga bel bog'laydigan yoshlar uchun muhim ahamiyat kasb etadi.
Bugundan e'tiboran respublika miqyosida “Jasorat maktablari”ga qabul sinovlarining ikkinchi bosqichi boshlandi. Imtihonlar yurtimizning barcha hududlarini qamrab olib, bir vaqtning o'zida jami 208 ta binoda tashkil etildi.
Sinovlarning tashkiliy jarayoni
Tadbirning ochilish qismida harbiy orkestr sadolari yangrab, o'quvchilar va ularning ota-onalari tantanali kutib olindi. Shundan so'ng hamkor vazirlik hamda idoralar rahbarlari ishtirokchilarga muvaffaqiyat tilab, ularni vatanparvarlik ruhidagi kuy-qo'shiqlar ostida imtihon binolariga kuzatib qo'ydi.
Baholash tizimi va hakamlar
Jismoniy tayyorgarlik bo'yicha o'tkazilayotgan sinovlarda 4-sinf o'quv dasturidan kelib chiqqan holda, har bir nomzodga 5 ta jismoniy mashqni bajarish vazifasi yuklatildi. Mazkur bosqichdagi ko'rsatkichlarni xolisona baholash uchun jami 1 664 nafar malakali hakamlar jalb qilindi. Bunda har bir maktab uchun kamida 8 nafardan hakam faoliyat yuritishi ta'minlangan bo'lib, nomzodlarning jismoniy tayyorgarligi 50 ballik tizim asosida baholanadi.
Manba: UzA
