O'zbekistonda sun'iy intellektga asoslangan ingliz tili platformasi ishga tushirilmoqda
Kasbiy ta'lim agentligi tashabbusi bilan Buyuk Britaniyaning EFEKTA kompaniyasi bilan hamkorlikda ingliz tilini o'qitishga mo'ljallangan raqamli platforma joriy etilmoqda.
Mamlakatimiz ta'lim tizimiga zamonaviy texnologiyalarni tatbiq etish doirasida yangi xalqaro platforma joriy qilinmoqda. Kasbiy ta'lim agentligi hamda Buyuk Britaniyaning EFEKTA kompaniyasi hamkorligida yo'lga qo'yilayotgan bu tizim sun'iy intellekt texnologiyalari yordamida ishlaydi.
Platformaning imkoniyatlari
Mazkur raqamli yordamchi o'quvchilarga ingliz tilini qiziqarli hamda individual tarzda o'rganish imkoniyatini taqdim etadi. Tizim har bir o'quvchining bilim darajasini tahlil qilgan holda shaxsiy o'quv dasturini shakllantiradi. Ishtirokchilar mashqlar, muloqot amaliyotlari va interaktiv topshiriqlar orqali o'z ko'nikmalarini rivojlantiradilar.
Shuningdek, platforma pedagoglar uchun ham qator qulayliklarni yaratadi. Dars rejalarini tuzish, topshiriqlarni tekshirish va baholash jarayonlari to'liq avtomatlashtiriladi. EFEKTA 60 yildan ortiq tajribaga ega xalqaro ta'lim guruhi tomonidan ishlab chiqilgan bo'lib, hozirgi kunda dunyoning 100 dan ortiq mamlakatida 24 milliondan ziyod o'quvchi ushbu tizim orqali ta'lim olgan.
Sinov jarayoni va rejalashtirilgan bosqichlar
Loyihaning samaradorligini baholash uchun dastlab sinov bosqichi amalga oshiriladi. Unga ko'ra, 100 nafar ingliz tili o'qituvchisi jalb etilib, ular uchun maxsus treninglar tashkil etiladi. Shuningdek, 5000 nafar o'quvchi platformani sinovdan o'tkazadi.
Pilot bosqich yakunlariga ko'ra, loyiha 2026-yil sentabr oyidan boshlab TVYeT tizimidagi barcha o'quvchilarga bosqichma-bosqich joriy etilishi rejalashtirilmoqda. Muhokamalar davomida eng faol o'qituvchilar va yuqori natija ko'rsatgan o'quvchilarni Londonga ta'limiy safarlarga yuborish imkoniyati ham ko'rib chiqildi.
Manba: UzA
