Samarqand davlat veterinariya meditsinasi universiteti Nukus filialida korrupsiyaga qarshi ochiq muloqot o'tkazildi

Samarqand davlat veterinariya meditsinasi, chorvachilik va biotexnologiyalar universiteti Nukus filialida o'quv jarayonlarida ochiqlikni ta'minlashga bag'ishlangan uchrashuv tashkil etildi. Talim dargohida o'tkazilgan mazkur tadbir "O'quv jarayonlarida korrupsiyaning oldini olish hamda unga qarshi kurashish borasida amalga oshirilayotgan ishlar" deb nomlandi. Unda OAV vakillari, jamoatchilik faollari hamda oliygoh jamoasi qatnashdi.

Ta'limda adolat va halollik muhitini mustahkamlash

Tadbir davomida mamlakatimizda davlat boshqaruvi va jamiyat hayotining barcha yo'nalishlarida shaffoflik tamoyillari ustuvor vazifaga aylangani qayd etildi. Xususan, oliy ta'lim muassasalarida halollik muhitini mustahkamlash, korrupsiya holatlarining oldini olish va jamoatchilik nazoratini yanada kuchaytirishga alohida e'tibor qaratilmoqda. Ta'lim tizimida adolat tamoyillarini qaror toptirish, yoshlarning bilim va salohiyatini xolis baholash hamda ular uchun teng sharoitlar yaratish asosiy maqsadlardan biri ekani ta'kidlandi.

Korrupsiyaga qarshi ko'rilayotgan choralar

Muloqot davomida filialda korrupsiyaning oldini olish yuzasidan amalga oshirilayotgan chora-tadbirlar haqida batafsil axborot berildi. O'quv jarayonlarini shaffof tashkil etish, baholash tizimida adolatga qat'iy amal qilish, talabalarning murojaatlarini o'z vaqtida o'rganish borasidagi ishlar ko'rib chiqildi. Shuningdek, talabalar bilan muntazam ravishda ochiq muloqotlar o'tkazish, ularning takliflarini tinglash va adolatsizlik holatlariga nisbatan murosasiz muhitni shakllantirish muhimligi aytib o'tildi.

Tadbir yakunida jurnalistlar o'zlarini qiziqtirgan savollarga mas'ullardan batafsil javoblar olishdi. Ishtirokchilar ta'lim jarayonlarida shaffoflikni yanada oshirish, talabalarning huquq va manfaatlarini himoya qilish hamda kelgusidagi vazifalar yuzasidan o'z fikr va mulohazalarini almashishdi.