O'zbekistonda xalqaro standartlarga mos integratsiyalashgan dasturlar oliy maktabi ochiladi

Prezidentning respublikada xalqaro ta'lim standartlari asosida o'rta maxsus, kasbiy va oliy ta'lim dasturlarini joriy etishga doir qo'shimcha chora-tadbirlar to'g'risidagi qaroriga muvofiq yangi tuzilma ish boshlaydi. Unga ko'ra, Buyuk Britaniyaning ilg'or tajribasidan foydalangan holda integratsiyalashgan ta'lim dasturlarini keng tatbiq etish maqsadida Toshkent arxitektura-qurilish universiteti huzurida Integratsiyalashgan dasturlar oliy maktabi tajriba-sinov tariqasida tashkil etilishi belgilandi.

Vakolatlar va xalqaro hamkorlik

Qarorga binoan, mamlakatda integratsiyalashgan ta'lim dasturlarini rivojlantirish uchun Buyuk Britaniyaning IQF ta'lim tashkiloti bilan hamkorlikda ochilgan Xalqaro malakalar va baholash markazining vakolatlari kengaytiriladi. Mazkur markazga ishlab chiqilgan ta'lim dasturlarini QS va Times Higher Education xalqaro reytinglarining top-100 taligiga kiruvchi hamkor universitetlar akademik talablariga moslashtirish vazifasi topshirildi.

Shuningdek, ushbu oliygohlar tomonidan tan olinadigan bakalavriat bosqichida "1+3", "2+2" hamda magistraturada "1+1" ta'lim modellarini ishlab chiqish ham nazarda tutilgan. Hujjat doirasida yetakchi xorijiy oliy ta'lim muassasalarining diplomlarini taqdim etishga qaratilgan tuzilmalar, jumladan, kampuslar, filiallar, franshizalar va ta'lim dasturlarini amalga oshirish markazlarini ochish bo'yicha kelishuvlarga erishish choralari belgilandi. Bu kabi tashabbuslar mamlakatimizda xalqaro ta'lim dasturlarini kengaytirish, yoshlarga nufuzli xorijiy universitetlar bilan qo'shma ta'lim olish imkoniyatini yaratish va oliy ta'lim tizimining raqobatbardoshligini oshirishga xizmat qiladi.