O'zbekistonlik o'quvchilar Fransiyadagi xalqaro olimpiadada yuqori natijalarni qo'lga kiritdi

Fransiyaning Nitsa shahrida matematika, ingliz tili va mental arifmetika yo'nalishlari bo'yicha xalqaro olimpiada bo'lib o'tdi. Musobaqada qariyb 20 ga yaqin davlatdan 300 dan ortiq ishtirokchi qatnashdi. O'zbekiston nomidan Al-Jabr xalqaro maktabi o'quvchilari ishtirok etib, yuqori natijalarni qayd etdi. Safar davomida tayyorgarlik to'xtamadi va o'quvchilar uzoq parvoz vaqtida ham shug'ullandi.

Musobaqa natijalari

Musobaqa mental arifmetika yo'nalishidan boshlanib, matematika va ingliz tili bo'yicha bellashuvlar bilan davom etdi. Yakunda 37 nafar o'quvchidan 33 nafari sovrindorlar qatoridan joy oldi:

• 14 nafar o'quvchi uchinchi o'rin,
• 8 nafar o'quvchi ikkinchi o'rin,
• 7 nafar o'quvchi birinchi o'rin,
• 3 nafar o'quvchi oliy o'rin,
• 1 nafar o'quvchi esa "superchempion" unvonini qo'lga kiritdi.

Al-Jabr xalqaro maktabi rahbari Matluba Karaxodjayeva o'quvchilarning bilim darajasi va intizomi xalqaro miqyosda e'tirof etilganini ta'kidladi. Uning so'zlariga ko'ra, O'zbekiston ushbu olimpiadada eng uzoq masofadan kelgan davlat sifatida alohida e'tibor qozondi. Olimpiadadan so'ng o'quvchilar Fransiya, Monako, Parij, Shveytsariya, Germaniya, Avstriya va Vengriyani qamrab olgan Yevropa bo'ylab ilmiy-ma'rifiy sayohatda ishtirok etdi.