Ichki audit xizmati xodimlarini sertifikatlash va ularning malakasini oshirish tartibi tasdiqlandi

O'zbekiston Respublikasi Vazirlar Mahkamasi davlat organlari va tashkilotlari ichki audit xizmatlari xodimlarining malakasini sertifikatlash hamda ularni uzluksiz kasbiy rivojlantirish tartibini tasdiqladi. Yangi qarorga muvofiq, sohaga oid maxsus nizom kuchga kirdi.

Sertifikatlash va baholash tartibi

Nizom doirasida ichki audit xodimlari malakasini ikki bosqichda baholash tizimi yo'lga qo'yiladi. Shuningdek, sertifikatlangan mutaxassislarning bilimini doimiy oshirib borishga qaratilgan uzluksiz kasbiy rivojlantirish tizimi joriy etiladi. Imtihonlarga tayyorgarlik ko'rish uchun an'anaviy va masofaviy shakldagi o'quv kurslari tashkil etilib, malaka imtihonlarida foydalaniladigan test topshiriqlari yo'nalishlari aniq belgilab berildi.

Sertifikat O'zbekiston auditorlar palatasi tomonidan malaka imtihonini muvaffaqiyatli topshirgan talabgorlarga taqdim etiladi. Bunda malaka imtihoni O'zbekiston Respublikasi Oliy ta'lim, fan va innovatsiyalar vazirligi huzuridagi Bilim va malakalarni baholash agentligi tomonidan o'tkaziladi.

Muhim talablar va muddatlar

2027-yil 1-iyuldan boshlab professional ichki auditor sertifikatiga ega bo'lmagan shaxslarning ichki audit xizmatining bo'lim boshlig'i va undan yuqori lavozimlarida, shuningdek, xizmat bir nafar shtatdan iborat bo'lganda ushbu shtatda ishlashiga yo'l qo'yilmaydi. Shuningdek, amaliyotchi ichki auditor sertifikati mutaxassisning umumiy bilimi va malakasini tasdiqlab, unga bo'lim boshlig'i va undan yuqori lavozimlardan tashqari boshqa lavozimlarda faoliyat yuritish imkonini beradi.

Mazkur Nizom kuchga kirgunga qadar ichki audit milliy malaka sertifikatiga ega bo'lgan shaxslardan sertifikat amal qilish muddati tugagunga qadar amaliyotchi ichki auditor sertifikatini olish talab etilmaydi. Bunday shaxslar sertifikat muddati tugashidan bir oy avval Auditorlar palatasi tomonidan shaxsiy kabineti orqali ogohlantiriladi. Biroq, ichki audit milliy malaka sertifikatiga ega shaxslar ham nizomda belgilangan tartibda uzluksiz kasbiy rivojlantirish talablarini bajarishi shart.