Pedagoglar uchun xalqaro tajriba asosida maxsus master-trenerlar tayyorlanmoqda
Maktabgacha va maktab ta'limi vazirligi, A.Avloniy instituti va YUNESKO hamkorligida pedagoglar malakasini oshirish bo'yicha treninglar o'tkazilmoqda.
Pedagogik kadrlarning kasbiy mahoratini uzluksiz oshirib borish ta'lim sifatini ta'minlashda muhim o'rin tutadi. Tashkil etiladigan mahorat darslari orqali o'qituvchilar zamonaviy ta'lim usullari, innovatsion texnologiyalar hamda interaktiv metodikalarni o'zlashtiradilar. Bu esa ularga o'z tajribasini boyitish va o'quvchilar bilan ishlashda ilg'or yondashuvlarni tatbiq etish imkonini beradi.
Ayni paytda Maktabgacha va maktab ta'limi vazirligi, A.Avloniy nomidagi pedagogik mahorat milliy instituti hamda YUNESKO hamkorligida master-trenerlarni tayyorlash dasturi amalga oshirilmoqda. “Uslubiy ekspertiza, rejalashtirish, tashkil etish va baholash” mavzusida tashkil etilgan navbatdagi mashg'ulotlarni YUNESKO eksperti, professor Katarina Popovich olib bordi.
Mentorlar faoliyatini tashkil etish rejalari
Mazkur dastur doirasida tayyorlanayotgan master-trenerlar kelgusida xalqaro mutaxassislar bilan birgalikda Buxoro, Farg'ona va Surxondaryo viloyatlaridan sarlab olingan 300 nafar mentor uchun maxsus o'quv mashg'ulotlarini o'tkazishi ko'zda tutilgan.
Trening jarayonida ishtirokchilar turli nazariyalarga asoslangan didaktik tanlovlar o'tkazish, ehtiyojlarni turli darajalarda baholash hamda kompetensiyaga yo'naltirilgan natijalarni shakllantirish bo'yicha zarur bilim va ko'nikmalarni egalladilar.
Manba: UzA
