Prezident sovrini uchun Ilg'or muhandislik maktabi milliy tanlovi o'tkaziladi

Hukumat qaroriga muvofiq, O'zbekiston Respublikasi Prezidenti sovrini uchun Ilg'or muhandislik maktabi milliy tanlovini tashkil etish va o'tkazish tartibi tasdiqlandi. Tasdiqlangan nizomga ko'ra, mazkur musobaqada qatnashish istagini bildirgan ta'lim muassasalari har yili 1 yanvardan 1 fevralgacha maxsus platforma orqali ro'yxatdan o'tishi shart va o'z maktabining terma jamoasi tarkibini shakllantiradi.

Tanlov bosqichlari

Musobaqa uchta asosiy bosqichda tashkil etiladi:

• tuman bosqichi har yili 1 aprelga qadar tumandagi maktab terma jamoalari o'rtasida o'tkaziladi;
• hududiy bosqich har yili 1 iyulga qadar tuman bosqichida birinchi o'rinni qo'lga kiritib, g'olib bo'lgan maktab terma jamoalari o'rtasida tashkil etiladi;
• respublika bosqichi har yili 1 oktyabrga qadar hududiy bosqichda birinchi o'rinni egallab, g'oliblikni qo'lga kiritgan jamoalar o'rtasida o'tkaziladi.

G'oliblarni taqdirlash tartibi

Tanlov g'oliblari bazaviy hisoblash miqdorining quyidagi miqdorlarida pul mukofotlari bilan rag'batlantiriladi:

• tuman va shahar bosqichida birinchi o'rin uchun BHMning 200 baravari, ikkinchi o'rin uchun BHMning 150 baravari, uchinchi o'rin uchun BHMning 100 baravari miqdorida;
• hududiy bosqichda birinchi o'rin uchun BHMning 300 baravari, ikkinchi o'rin uchun BHMning 250 baravari, uchinchi o'rin uchun BHMning 200 baravari miqdorida;
• respublika bosqichida birinchi o'rin uchun BHMning 600 baravari, ikkinchi o'rin uchun BHMning 450 baravari, uchinchi o'rin uchun BHMning 300 baravari miqdorida pul mukofotlari beriladi.