Samarqand davlat universitetida universitet kuni keng nishonlandi

Samarqand davlat universiteti Mirzo Ulug'bek oliy madrasasining vorisi ekanligida ulkan sharaf va katta mas'uliyat mujassamlashgan. 2016-yildan buyon universitetni zamonaviy oliygoh sifatida barpo etish ishlari olib borilmoqda. Prezident Shavkat Mirziyoyevning 2023-yil avgust oyida universitetning Biokimyo institutiga tashrifi bu boradagi vazifalarning istiqbollarini belgilab berdi.

Ilmiy salohiyat va xalqaro e'tirof

Universitet bitiruvchilari orasidan akademiklar Akbar Otaxo'jayev, Tolib Mo'minov, Nazar To'rayev, Muhsin Ashurov va Bobomurod Ahmedovlar yetishib chiqqan. Shuningdek, O'zbekiston Respublikasi fan arbobi, Texas universiteti professori Anvar Zohidov, Berlin texnika universiteti professori Valentin Popov, Kaliforniya universiteti professori Sharof To'g'izov hamda Marburg universiteti katta ilmiy xodimi Sharof Xudoyberdiyevlar ta'lim dargohining xalqaro nufuzini yuksaltirmoqda. Bugungi kunda oliygohning Faxriy professorlari safida ikki nafar Nobel mukofoti laureatining borligi e'tiborga molikdir.

Bayram tadbirlari va Amir Temur bayrog'i

Universitet kuni munosabati bilan Amir Temur maqbarasida Mirzo Ulug'bek ruhiga Qur'on tilovat qilindi. Tadbirda viloyat hokimligi mas'ullari, jamoatchilik vakillari va professor-o'qituvchilar ishtirok etdilar. Shuningdek, bosh binoga ma'rifiy yuksalish ramzi sifatida Amir Temur saltanati bayrog'i o'rnatildi.

Tantanali marosimda SamDU rektori, Oliy Majlis Senati a'zosi Rustam Xolmurodov va Markaziy Osiyo xalqlari tillari va madaniyati instituti direktori Jo'liboy Eltazarovlar so'zga chiqib, mazkur sananing ijtimoiy-ma'rifiy ahamiyatini ta'kidlab o'tdilar. Bayram tantanalari universitet xiyobonida davom etib, unda Samarqand viloyati hokimi Adiz Boboyev va boshqa rasmiy shaxslar qatnashdi.

Ma'naviy meris va yoshlar an'analari

Universitet o'z ajdodlarining ma'rifiy an'analarini munosib davom ettirmoqda. Xususan, 2024-yil 20-avgustdan boshlab muassislikda “Samarqandim” va “My Samarkand” jurnali nashr etib kelinmoqda. Ushbu nashr 1913-yilda Mahmudxo'ja Behbudiy asos solgan “Oyina” jurnalining ma'naviy vorisi hisoblanadi.

Bayram doirasida talabalar va jamoatchilik ishtirokida madaniy-ma'rifiy tadbirlar, talabalar jamoalari o'rtasida “Zakovat” intellektual o'yinlari tashkil etildi. Universitetning tarixiy faoliyati va ta'lim jarayonlariga bag'ishlangan chiqishlar yig'ilganlarda katta taassurot qoldirdi.