Samarqand iqtisodiyot va servis institutining 95 yilligi nishonlandi

Samarqand iqtisodiyot va servis instituti tashkil etilganining 95 yilligi munosabati bilan ushbu nufuzli oliy ta'lim muassasasida xalqaro ilmiy-amaliy anjuman tashkil etildi. Qariyb bir asrlik tarixga ega ta'lim dargohining yubileyi mamlakat ta'lim tizimi, iqtisodiyot hamda servis sohalari uchun muhim voqea sifatida nishonlandi.

Tantanali tadbirda Oliy ta'lim, fan va innovatsiyalar vaziri o'rinbosari U.Salomov, Samarqand viloyati hokimining o'rinbosari X.To'xtayev, respublika oliy ta'lim muassasalari rektorlari, xorijiy hamkorlar, professor-o'qituvchilar, talabalar va jamoatchilik vakillari qatnashdi. Anjumanda so'zga chiqqanlar institutning mamlakat oliy ta'lim tizimidagi o'rni va ilm-fan rivojiga qo'shgan hissasini alohida ta'kidladi.

Kadrlar tayyorlashdagi tarixiy yo'l

Institut rektori Muxiddin Po'latovning ta'kidlashicha, ta'lim maskani o'z faoliyati davomida iqtisodiyot, savdo, xizmat ko'rsatish, turizm va tadbirkorlik tarmoqlari uchun minglab yuqori malakali mutaxassislarni yetishtirib bergan. Turli yillarda xalq xo'jaligi uchun tovarshunoslar, hisobchilar va iqtisodchilar tayyorlangan bo'lib, murakkab iqtisodiy davrlarda ham ta'lim jarayoni to'xtamagan. Jumladan, mustaqillikning ilk yillarida qabul cheklanganiga qaramay, olimlar va ustozlar kadrlar tayyorlashni izchil davom ettirgan.

Bugungi kunda mazkur oliygoh iqtisodiyot, turizm va servis yo'nalishlari uchun raqobatbardosh kadrlar tayyorlaydigan yetakchi maskanlardan biridir. Xususan, respublikada birinchi bo'lib dual ta'lim tizimini joriy etgan oliygohlardan biri sifatida talabalarning nazariy bilimini amaliyot bilan bog'lashga katta e'tibor qaratilmoqda.

Xalqaro hamkorlik va yubiley ko'rgazmasi

Anjuman qatnashchilari institutning zamonaviy ta'lim dasturlari, xalqaro aloqalari, ilmiy salohiyati va kelgusidagi strategik rejalarini muhokama qildi. Xorijiy universitetlar bilan yo'lga qo'yilgan qo'shma dasturlar, akademik almashinuvlar va ilmiy loyihalar ta'lim sifatini oshirishga xizmat qilayotgani qayd etildi.

Tadbir doirasida institutning boy tarixi va erishilgan yutuqlarini aks ettiruvchi maxsus ko'rgazma tashkil etildi. Oliy Majlis Senati a'zosi Shavkat Sharipov mazkur dargoh bitiruvchisi ekanidan faxrlanishini bildirib, mamlakatdagi ko'plab taniqli tadbirkorlar, rahbarlar va iqtisodchilar aynan shu institut tarbiyalanuvchilari ekanini e'tirof etdi.