Samarqandda “Nurli maskan” maktab-internatlari o'quvchilari o'rtasida fan olimpiadasi o'tkazildi

Samarqand shahrida “Nurli maskan” ixtisoslashtirilgan maktab-internatlari o'quvchilari o'rtasida fan olimpiadasining respublika bosqichi tashkil etildi. Mazkur bilimlar bellashuvida mamlakatimizdagi ushbu yo'nalishdagi ta'lim muassasalaridan jami 145 nafar 11-sinf o'quvchisi ishtirok etdi. O'g'il-qizlar ona tili va adabiyot, rus tili va adabiyoti, matematika hamda tarix fanlari bo'yicha o'z bilimlarini sinovdan o'tkazdilar.

Olimpiada g'oliblari va taqdirlash jarayoni

Ochiq va shaffof ruhda o'tgan musobaqa natijalariga ko'ra, bir qator iqtidorli o'quvchilar yuqori o'rinlarni egallashdi. Jumladan, ona tili va adabiyot fani bo'yicha Sirdaryo viloyati Guliston tumanidagi 11-“Nurli maskan” maktabi o'quvchisi Surayyo Ko'charova birinchi o'rinni oldi. Rus tili va adabiyoti fanidan ham ushbu ta'lim maskani o'quvchisi Shahzod Mamasoliyev g'olib bo'ldi. Matematika fanida Samarqand shahridagi 59-“Nurli maskan” maktabi o'quvchisi Karashma Abduhalimova birinchi o'rinni qo'lga kiritgan bo'lsa, tarix fanidan Navoiy shahridagi “Nurli maskan” maktabi vakili Diyorbek Murodov birinchi o'ringa sazovor bo'ldi.

Musobaqa yakunida barcha sovrindorlarga pul mukofotlari topshirildi. Unga ko'ra, birinchi o'rinni egallagan o'quvchilarga 4 million 944 ming so'mdan, ikkinchi o'rin sohiblariga 3 million 296 ming so'mdan, uchinchi o'rin egalariga esa 2 million 472 ming so'mdan pul mukofotlari berildi. Shuningdek, g'oliblarga maxsus sertifikatlar va esdalik sovg'alari topshirildi. Taqdirlash marosimida Ijtimoiy himoya milliy agentligi direktori o'rinbosari Usmon Sharifxo'jayev hamda “Yandex Uzbekistan” vakili Sardor Qodirov qatnashdilar.