Sasseks universiteti O'zbekistonda o'z kampusini ochish imkoniyatlarini ko'rib chiqmoqda

Sasseks universiteti bilan ta'lim sohasidagi hamkorlik istiqbollari

Buyuk Britaniyaning nufuzli Sasseks universiteti rahbariyati O'zbekiston bilan ta'lim yo'nalishidagi aloqalarni yanada kengaytirishdan manfaatdorligini ta'kidladi. Tomonlar qo'shma ta'lim dasturlarini hayotga tatbiq etish, talabalar hamda professor-o'qituvchilar almashinuvini yo'lga qo'yish, malaka oshirish va ilmiy tadqiqotlar olib borish kabi yo'nalishlarda hamkorlik qilishga tayyor ekanliklarini bildirdilar. O'tkazilgan muzokaralar yakunida esa Buyuk Britaniya universiteti rahbariyati O'zbekistonda o'z kampusini tashkil etish imkoniyatlarini o'rganib chiqishga tayyorligini qayd etdi.

Davra suhbati va tibbiyot yo'nalishidagi rejalar

Tashrif doirasida Sasseks universiteti professorlari va tadqiqotchilari ishtirokida maxsus davra suhbati ham tashkil etildi. Unda yurtimizda amalga oshirilayotgan keng ko'lamli islohotlar, ta'lim tizimidagi yangilanishlar, qulay investitsiya muhiti hamda yashil iqtisodiyot sohasiga oid loyihalar xususida batafsil ma'lumot berildi.

Shu bilan birga, Brayton-Sasseks tibbiyot maktabi rahbariyati bilan ham uchrashuv o'tkazilib, tibbiyot sohasidagi hamkorlik masalalari atroflicha muhokama qilindi. Britaniya tomoni O'zbekistonning tibbiyot oliy ta'lim muassasalari bilan yaqindan ishlashga, xususan, pediatriya, endokrinologiya va yuqumli kasalliklarni davolash yo'nalishlarida hamkorlikni rivojlantirishga qiziqish bildirgani ma'lum bo'ldi.