O'zbekistonlik talabalar uchun Xitoyda maxsus ta'lim dasturlari ochilishi kutilmoqda
O'zbekiston diplomatlari Xitoyning Chjetszyan provinsiyasida o'zbekistonlik talabalar uchun ta'lim dasturlari va amaliyot o'tash masalalarini muhokama qildi.
O'zbekistonning Shanxaydagi konsulxonasi vakillari Chjetszyan provinsiyasiga amalga oshirgan safari doirasida institut prorektori Livey Fen bilan muzokaralar o'tkazdi. Uchrashuvda o'zbekistonlik talabalar uchun uzoq muddatli ta'lim dasturlari, akademik almashinuv, shuningdek, talaba va o'qituvchilar uchun qisqa muddatli kurslarni yo'lga qo'yish masalalari ko'rib chiqildi.
Yangi yo'nalishlar va amaliyot
Ta'lim jarayonini muhandislik, transport, hamshiralik ishi, to'qimaqilik sanoati, yangi energetika, elektromobillarni ta'mirlash hamda sun'iy intellekt yo'nalishlarida tashkil etish rejalashtirilmoqda. Shuningdek, amaliy tayyorgarlikka alohida e'tibor qaratilib, o'zbekistonlik yoshlarning Szyasin shahridagi yetakchi ishlab chiqarish korxonalari, tibbiyot muassasalari, metropoliten hamda temir yo'l vokzallarida kasbiy tajriba orttirishi ko'zda tutilgan.
Delegatsiyaning O'zbekistonga tashrifi
Tomonlar O'zbekiston texnikumlari bilan hamkorlik mexanizmlarini muhokama qilish hamda tegishli kelishuvlarni imzolash maqsadida 2026-yil noyabr oyida Livey Fen boshchiligidagi delegatsiyani O'zbekistonga yuborishga tayyorligini bildirdi. Ma'lumot uchun, Szyasin Nanyan politexnika instituti 2002-yilda Shanxay Szyao Tun universiteti ko'magida tashkil etilgan xususiy professional oliy ta'lim muassasasi bo'lib, hozirda unda qariyb 12 ming nafar talaba tahsil oladi. Mazkur institutning yettita ixtisoslashtirilgan maktabida 30 dan ortiq mutaxassislik bo'yicha ta'lim beriladi.
Manba: Kun.uz
