Senatda Garvard universiteti talabalari bilan uchrashuv o'tkazildi

Oliy Majlis Senatida dunyoning yetakchi ta'lim maskanlaridan biri bo'lgan AQSHning Garvard universiteti qoshida faoliyat olib boruvchi Markaziy Osiyo va turkiy mamlakatlar Kokusi a'zosi bo'lgan talabalar bilan muloqot bo'lib o'tdi. Tadbirda Senat Raisi Tanzila Norboyeva hamda Ijtimoiy himoya milliy agentligi direktori birinchi o'rinbosari Shahnoza Mirziyoyeva qatnashdi.

Muloqot davomida O'zbekistonda ta'lim tizimi, iqtisodiyot hamda davlat boshqaruvi yo'nalishlarida amalga oshirilayotgan keng ko'lamli islohotlar, qonunchilikdagi o'zgarishlar va yoshlarni har tomonlama qo'llab-quvvatlashga qaratilgan chora-tadbirlar muhokama qilindi. Shuningdek, mamlakatda ehtiyojmand qatlamlarni qo'llab-quvvatlash, ijtimoiy xizmatlar sifatini oshirish hamda zamonaviy ijtimoiy himoya mexanizmlarini joriy etish borasidagi ishlar alohida qayd etildi.

Garvard universiteti qoshidagi mazkur Kokusi O'zbekiston va AQSH o'rtasida ilm-fan, ta'lim va innovatsiyalar sohalaridagi aloqalarni mustahkamlovchi muhim yoshlar platformasiga aylanib borayotgani e'tirof etildi. Talabalar O'zbekistonning ochiq tashqi siyosatiga qiziqish bildirib, bu boradagi amaliy tajriba bilan yaqindan tanishish istagini bildirdi.

T.Norboyeva o'z so'zida yoshlar siyosati davlat siyosatining ustuvor yo'nalishlaridan biri ekanini ta'kidlab, ularning tashabbuslarini rag'batlantirish, zamonaviy bilim olishlari uchun sharoit yaratish hamda global ilmiy hamjamiyatga integratsiyalashuvini ta'minlash muhimligini urg'uladi. O'z navbatida, Sh.Mirziyoyeva kelajak istiqbollarini yoshlar ishtirokisiz tasavvur qilib bo'lmasligini, bugungi qarorlar kelgusi avlod hayotini belgilashini qayd etib, yoshlarning fikrlari va tashabbuslariga quloq tutish muhimligini bildirdi.

Uchrashuv yakunida tajriba almashish, yangi tashabbuslarni muhokama qilish hamda kelgusida qo'shma ilmiy va ta'lim loyihalarini hayotga tatbiq etish imkoniyatlari yuzasidan takliflar ilgari surildi.