Sirdaryo viloyatida Beshinchi Ustozlar milliy forumi o'tkazildi

Mamlakatimiz mustaqilligining 35 yilligi arafasida Guliston shahridagi 2-sonli umumiy o'rta ta'lim maktabida Beshinchi Ustozlar milliy forumining Sirdaryo viloyati bosqichi bo'lib o'tdi. Sirdaryo viloyati Maktabgacha va maktab ta'limi boshqarmasi tashabbusi bilan Sifatli ta'lim — Yangi O'zbekiston taraqqiyotining mustahkam poydevori shiori ostida tashkil etilgan tadbir yangi o'quv yili arafasida ta'lim tizimidagi ustuvor vazifalarni belgilashga bag'ishlandi.

Ta'lim sohasi ko'rsatkichlari va yutuqlar

Bugungi kunda Sirdaryo viloyatida 1 541 ta ta'lim tashkiloti faoliyat yuritmoqda. Shundan 348 tasi umumiy o'rta ta'lim maktabi, 1 179 tasi esa maktabgacha ta'lim tashkilotlaridir. 2026-yilning birinchi yarim yilligida viloyatda maktabgacha ta'lim bilan qamrov 82,3 foizga, ya'ni 71 164 nafar bolaga yetkazildi. Olti yoshli bolalarni maktabga tayyorlov tizimi bilan qamrab olish darajasi esa 95,2 foizni tashkil etdi. Shuningdek, viloyat ta'lim tizimida 13 461 nafar pedagog faoliyat yuritib, ularning 2 071 nafari oliy, 2 928 nafari birinchi, 3 140 nafari ikkinchi malaka toifasiga ega.

Forumda o'quvchilarning xalqaro miqyosdagi yutuqlari ham alohida e'tirof etildi. Xitoyda o'tkazilgan 67-Xalqaro matematika olimpiadasi — IMO–2026da sirdaryolik ikki nafar o'quvchi medallarga ega chiqdi. Yangiyer shahar ITMA IM o'quvchisi Dostonbek Rahmonqulov kumush medalni, Al-Xorazmiy nomidagi ixtisoslashtirilgan maktabning Guliston filiali o'quvchisi Azizbek Mamajonov bronza medalini qo'lga kiritdi. Davlat rahbarining tegishli qaroriga muvofiq, kumush medal sovrindoriga 618 million so'm, uning ustoziga 103 million so'm, bronza medal sohibiga 412 million so'm, uning ustoziga esa 61,8 million so'm pul mukofoti berilishi belgili bo'lib, ustozlarning malaka toifasi bir pog'onaga oshirilishi ko'zda tutilgan.

Kelgusi rejillar va vazifalar

Tadbir davomida 2026-yilning ikkinchi yarmida viloyat ta'lim tizimi oldida turgan vazifalar belgilab olindi. Xususan, maktabgacha ta'lim qamrovini 84,9 foizga, oliy va birinchi toifali o'qituvchilar ulushini 40,2 foizga, milliy va xalqaro sertifikatlarga ega pedagoglar sonini 4 000 nafarga yetkazish maqsad qilingan. 2025/2026 o'quv yilida viloyatdagi 310 ta maktabda yangi baholash tizimi joriy etilib, yil yakuniga qadar mazkur ko'rsatkichni 100 foizga yetkazish rejalashtirilgan. Shuningdek, 2026-yilda 44 ta maktab va 20 ta maktabgacha ta'lim tashkilotida qurilish-ta'mirlash ishlari amalga oshirilmoqda.

Forum yakunida tadbirda faol ishtirok etgan 262 nafar umumiy o'rta ta'lim maktabi o'qituvchisiga sertifikatlar topshirildi.