Talabalar turar joyiga onlayn ariza topshirish tartibi qanday
Talabalar yotoqxonasiga joylashish uchun my.gov.uz yoki kontrakt.edu.uz orqali ariza topshirish va imtiyozlarni ko'rsatish tartibi tushuntirildi.
Oliy ta'lim muassasalari talabalarini yotoqxona bilan ta'minlash jarayonida elektron tizimlar orqali ariza topshirish tartibi belgilangan. Unga ko'ra, talabalar my.gov.uz Yagona interaktiv davlat xizmatlari portalidagi shaxsiy kabinetiga kirishi lozim. Shundan so'ng ommabop xizmatlar bo'limidan talabalar turar joyiga joylashtirish xizmatini tanlash talab etiladi. Shuningdek, arizalarni kontrakt.edu.uz tizimi orqali ham onlayn tarzda topshirish imkoniyati mavjud.
Ma'lumotlarni tekshirish va rasmiylashtirish
Ariza berish jarayonida talabaning shaxsiy ma'lumotlari, JShShIR, pasport ma'lumotlari hamda o'qish joyi tizimda avtomatik shakllanadi. Talaba ushbu ma'lumotlarning to'g'riligini tekshirib chiqishi va ommaviy oferta shartlariga rozilik bildirishi kerak. Rozilik berishdan oldin shartlar bilan to'liq tanishib chiqish tavsiya etiladi. Shuningdek, doimiy yashash joyi va turar joy bilan bog'liq qo'shimcha ma'lumotlarni talabaning o'zi kiritishi talab etiladi. Barcha ma'lumotlarning xatosiz kiritilishi muhim sanaladi, chunki noto'liq yoki xato ma'lumotlar arizani ko'rib chiqish jarayoniga ta'sir qilishi mumkin.
Imtiyozlardan foydalanish tartibi
Talabalar turar joyiga joylashtirishda ayrim toifadagi talabalarga ustuvorlik beriladi. Agar talabaning oilasida to'lov-kontrakt asosida tahsil olayotgan yana bir talaba bo'lsa, tegishli imtiyozdan foydalanish uchun uning pasport ma'lumotlarini ham kiritish talab etiladi. Shuningdek, ariza beruvchi yoki uning oilasi belgilangan ijtimoiy toifalardan biriga kirsa, bu ma'lumotlar elektron tizimlar orqali avtomatik aniqlanishi yoki tasdiqlovchi hujjatni yuklash talab qilinishi mumkin.
Manba: Kun.uz
