Texnika universiteti talabalari boshqa yotoqxona va ijaraga joylashtirildi
Toshkent shahridagi Texnika universiteti talabalari hali foydalanishga topshirilmagan yotoqxonadan ko'chirilib, boshqa joylarga joylashtirildi.
Poytaxt hokimining o'rinbosari boshchiligidagi ishchi guruh Talabalar shaharchasidagi davlat-xususiy sheriklik asosida qurilgan talabalar turar joyidagi vaziyatni o'rgandi. Ma'lum bo'lishicha, mazkur obyekt hali rasman foydalanishga topshirilmagan bo'lib, uning kadastr hujjatlari rasmiylashtirilmagan va tegishli ruxsatnomalar olinmagan.
Shuningdek, binoda issiq suv hamda isitish tizimlari ishga tushirilmagan, yong'in xavfsizligi talablariga ham javob bermagani aniqlangan. Talabalarning xavfsizligini ta'minlash maqsadida ular ushbu binodan chiqarilib, universitetning mavjud boshqa talabalar turar joylari hamda ijara xonadonlariga to'liq joylashtirildi.
To'lovlar qaytariladi
Ma'lum qilinishicha, mazkur bino uchun avval pul to'lagan talabalardan undirilgan mablag'lar tadbirkor tomonidan uch kun muddatda to'liq qaytarib berilishi ta'minlanadi.
Avvalroq poytaxtdagi Texnika universitetining 300 nafar talabasi yotoqxona uchun pul to'lagan bo'lsa-da, binodan chiqarib yuborilgani, yoshlar bu talab huquq idoralari va universitet ma'muriyati tomonidan qo'yilganini bildirgandi.
Manba: Kun.uz
