Texnikum rahbarlari uchun menejerlik sertifikatini olish tartibi tasdiqlandi
Hukumat qarori bilan texnikum direktorlari va ularning o'rinbosarlarini menejerlik o'quv kurslarida o'qitish hamda sertifikatlash tartibi belgilandi.
O'zbekistonda kasbiy ta'lim tashkilotlari rahbarlarining boshqaruv ko'nikmalarini rivojlantirish va ularning malakasini sertifikatsiyalash bo'yicha yangi tizim joriy etildi. Hukumatning 2026-yil 20-avgustdagi 451-son qarori bilan «Kasbiy ta'lim tashkilotlari direktorlari va direktor o'rinbosarlarini menejerlik o'quv kurslarida o'qitish va ularga menejerlik sertifikatini berish tartibi to'g'risida»gi nizom tasdiqlandi.
O'qishga ariza topshirish va yakuniy sinov
Tasdiqlangan nizomga muvofiq, texnikumlarda faoliyat yuritayotgan direktorlar hamda ularning o'rinbosarlari maxsus portal orqali ro'yxatdan o'tishlari talab etiladi. Buning uchun ular menejerlik o'quv kursida qatnashish uchun elektron ariza topshirishlari lozim.
O'quv kursini muvaffaqiyatli tamomlagan tinglovchilar yakuniy sinovdan o'tkaziladi. Mazkur sinovda ijobiy natija qayd etgan rahbarlarga natijalar e'lon qilingan kundan boshlab bir hafta ichida o'quv tashkiloti rahbarining buyrug'i asosida davlat namunasidagi menejerlik sertifikati beriladi. Sertifikat elektron shaklda rasmiylashtirilib, elektron raqamli imzo bilan tasdiqlanadi va unga maxsus QR-kod joylashtiriladi.
Ilmiy darajaga ega rahbarlar uchun imtiyoz
Shu bilan birga, ilmiy daraja yoki ilmiy unvonga ega bo'lgan direktorlar va ularning o'rinbosarlari uchun alohida tartib belgilangan. Unga ko'ra, ilmiy unvon yoki darajasi bor rahbarlarga menejerlik sertifikati o'z arizasiga asosan to'g'ridan-to'g'ri 3 yil muddatga beriladi.
Manba: Kun.uz
