Toshkent davlat yuridik universiteti xalqaro Jessup tanlovida yetakchilik qilmoqda

Philip Jessup nomidagi nufuzli xalqaro tanlov huquqshunos talabalar uchun dunyodagi eng yirik sud muhokamasi musobaqasi hisoblanadi. Mazkur musobaqada dunyo bo'ylab 700 dan ortiq yuridik maktablar ishtirok etadi. Musobaqa davomida talabalar xayoliy sud protsesslarini yechishadi, nizoning har ikki tomoni uchun dalillarni tadqiq qiladilar, yozma memorandumlar tuzadilar va sud uchun og'zaki chiqishlarni tayyorlaydilar. Har bir jamoa ariza beruvchi va javobgar tomonlar uchun ikkitadan yozma memorandum hamda 45 daqiqalik og'zaki chiqish tayyorlashi lozim.

Toshkent davlat yuridik universiteti jamoasi ushbu o'yinlarda MDH maydonida Rossiyadan keyin ikkinchi o'rinda turadi. 2019 yilda TDYuU jamoasi Vashingtondagi musobaqa finalida muvaffaqiyatli qatnashgan edi. Pandemiya sababli yuzaga kelgan tanaffus va keyingi ikki yillik omadsizliklardan so'ng, universitet jamoasi yana o'z kuchini tiklab, 2023 yildan boshlab Qozog'iston hamda Qirg'iziston jamoalarini mag'lub etdi va Vashingtondagi finalga yo'l oldi. 2025 yilgi musobaqalarda esa jamoa chorak finalgacha yetib borib, AQShning nufuzli Virjiniya universiteti jamoasidan ust keldi.

Muvaffaqiyat omillari va avlodlar almashinuvi

Universitet bu natijalarga erishishida bir necha muhim omillarga tayandi. Avvalo, tajribali avlod shakllandi. Avvalgi musobaqalarda qatnashgan tajribali yoshlarning ko'pchiligi hozirda TDYuUda dars bermoqda va o'z bilimlarini yoshlarga samarali yetkazmoqda. Natijada universitetda o'ziga xos Jessup maktabi yuzaga keldi va avlodlar almashinuvi sog'lom tus oldi.

Shuningdek, rahbarlar tomonidan talabalarga ko'rsatilgan moddiy yordam va alohida yondashuv ham muhim rol o'ynadi. Universitetning o'zida Jessup musobaqasida sudya sifatida ishlovchi professor-o'qituvchilar jamoasi shakllangani ham yuqori natijalarni ta'minlashga xizmat qildi.